Փաստ ինֆո

Գորիս-Կապան ճանապարհի ադրբեջանական ոստիկանական կետը ՀՀ տարածքում չէ: Այս մասին այսօր ԱԺ-ում լրագրողների հետ զրույցում հայտարարել է «Քաղաքացիական պայմանագիր» խմբակցության պատգամավոր Վահե Ղալումյանը.

«Ադրբեջանական ոստիկանական կետը ՀՀ տարածքում չէ: Այդ ճանապարհի որոշ հատվածներ անցնում են ադրբեջանական տարածքով: Դա ես չեմ ասում, քարտեզներն են նշում»,-ասել է ՔՊ-ական պատգամավորը:

Հարցին՝ այսինքն ընդունում է ադրբեջանական կողմի թե՞զը, պատգամավորն արձագանքեց, որ ոչ թե ինքն է ընդունում, այլ քարտեզներն են այդպես նշում:

Անդրադառնալով ՀՀ երկրորդ նախագահ Ռոբերտ Քոչարյանի այսօրվա հայտարարությանը, որ «ծնկած վիճակում հարմար չէ բանակցել», Ղալումյան ասաց, թե չի կիսում Ռոբերտ Քոչարյանի կարծիքը.

«Դա Ռոբերտ Քոչարյանի կարծիքն է, չեմ կիսում ես այդ կարծիքը։ Պարտված ենք համարում ինչպես իշխանությանը, այնպես էլ ընդդիմությանը և ամբողջ պետությանը»,-ասել է Ղալումյանը:

Մեկնաբանելով նաև Նիկոլ Փաշինյանի հայտարարությունը, թե պատրաստ է ականապատ դաշտերի բոլոր քարտեզները տրամադրել, այն պարագայում, երբ Ադրբեջանը վերադարձնի բոլոր գերիներին, Ղալումյանն ասաց, թե կարելի է մարդասիրական մղումներից ելնելով քարտեզները հանձնել՝ փոխարենը ստանալ բոլոր գերիներին.

«Եթե չեմ սխալվում ականապատված տարածքների քարտեզների մասին է խոսքը, որոնք այս պահին գտնվում են Ադրբեջանի այսօրվա դիրքերի թիկունքում: Դրանք մեզ պետք չեն, կարելի է մարդասիրական մղումներից ելնելով քարտեզները հանձնել՝ փոխարենը ստանալ բոլոր գերիներին»,-ասաց ՔՊ-ական պատգամավորը և ընդգծեց, որ պետք է երաշխիք ունենալ, նոր քարտեզները տալ:

Աղբյուր` Փաստինֆո