Փաստ ինֆո

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանն առաջադրված մեղադրանքը չի ընդունում, գնահատում է ապօրինի։ «Փաստինֆո»-ի թղթակցի հաղորդմամբ՝ այս մասին լրագրողների հետ զրույցում ասաց Աղվան Հովսեփյանի պաշտպանական խմբի անդամ Էրիկ Ալեքսանյանը։ 

Անդրադառնալով առաջադրված մեղադրանքին՝ փաստաբանը նշեց, որ առկա է բացառապես մեկ անձի ցուցմունք։ Վերջինս ցուցմունքում հայտարարել է, թե ունեցել է մի քանի քրեական գործերով մեղադրյալի կարգավիճակ, իսկ Աղվան Հովսեփյանը, լինելով գլխավոր դատախազ, իբրև հովանավորել է, ինչի դիմաց ինքը «Երևան» հեռուստաընկերության բաժնեմասերի մի մասը փոխանցել է նրան, մինչդեռ, այդ մեղադրանքի առնչությամբ չեն հարցաքննվել քննիչները, դատախազները։

«Մեզ համար պարզ կլիներ՝ կաշառք ստանալը համապատասխանու՞մ է իրականությանը հովանավորչության տեսանկյունից այն առումով, որ քննիչը կամ դատախազը ցուցմունք տար, որ տվյալ անձի նկատմամբ նման դրական վերաբերմունք է դրսևորվել, որովհետև այդ ժամանակվա գլխավոր դատախազն ասել է, որ տվյալ գործի նկատմամբ պետք է առանձնահատուկ մոտեցում ունենալ։ Միգուցե տրամաբանությունը երևար և մենք կարողանայինք խոսել մեղադրանքի առկայության մասին, բայց փաստորեն ստացվում է, որ այդ անձը քնել-արթնացել է, հիմա քննությանը հայտնում է, որ 50 տոկոս բաժնետոմս ինքը փոխանցել է Աղվան Հովսեփյանին, որ նա, լինելով գլխավոր դատախազ, հովանավորի, որ քրեական գործերով իր համար դրական ելք լինի»,- նշեց Ալեքսանյանը՝ ընդգծելով, որ դժվար է պատկերացնում, որ այդ գործերով կհայտնվի մի քննիչ, դատախազ, ով կգա և կհայտնի, որ Վարշամ Ղարիբյանի վերաբերյալ կարճման կամ այլ դատավարական որոշում կայացվել է, որովհետև գլխավոր դատախազն ասել է առանձնահատուկ վերաբերմունք ցուցաբերել։

Ալեքսանյանը նշեց, որ, եթե պաշտպանության կողմը միջնորդի, որ վերջիններս հարցաքննվեն, որոնք նշեն, որ երբեք ոչ մի հովանավորչություն չի եղել, որոշումները կայացվել են իրենց համոզմունքների համաձայն, ապա այդ դեպքում ինչ պետք է անեն այս գործով քննիչները, ապացույցների բավարար համակցություն չեն ունենա։

Անդրադառնալով մամուլում շրջանառվող լուրերին, համաձայն որի՝ Աղվան Հովսեփյանի վերաբերյալ քրեական գործը հարուցվել է հանցագործության մասին հաղորդումը ներկայացնելուց ամիսներ անց, ինչը խախտում է՝ փաստաբանը նշեց, որ նյութերի նախապատրաստման ժամկետը 10 օր է, ինչի ընթացքում վարույթն իրականացնող մարմինը պետք է որոշում կայացնի քրեական գործ հարուցելու, մերժելու կամ ըստ ենթակայության ուղարկելու մասին։  Մինչդեռ, տվյալ դեպքում 10-օրյա ժամկետը խախտվել է, իսկ ժամկետի խախտմամբ քրեական գործի հարուցումն ապօրինի է, հետևաբար, դրանից հաջորդիվ բոլոր քննչական, դատավարական գործողությունները չեն կարող ճանաչվել օրինական։։
Փաստաբանը չբացառեց, որ հետագայում կբարձրացվի գործի վարույթը կարճելու հարցը։

Աղբյուր` Փաստինֆո