Փաստ ինֆո

Վերաքննիչ քաղաքացիական դատարանի դատավոր Գագիկ Խանդանյանի վերաբերյալ Կոռուպցիայի կանխարգելման հանձնաժողովի եզրակացությունում պարփակված մեղադրանքը և՛ իր ձևակերպումների, և՛ իր որակումների տեսանկյունից այն աստիճանի խառնակ փաստաթուղթ է, որ այս ամիսների ընթացքում և առ այսօր չեն կարողանում պարզագույն որակումների հարցում կողմնորոշվել: Հանձնաժողովը բերել է մի փաստաթուղթ, որը ստեղծել է բաբելոնյան խառնաշփոթ: Այս մասին ԲԴԽ նիստին ասաց Գագիկ Խանդանյանի ներկայացուցիչ, իրավագիտության դոկտոր, պրոֆեսոր Արթուր Ղամբարյանը։ 

«Կոռուպցիայի կանխարգելման հանձնաժողովն արարքների իրավաբանական որակման տարրական կանոնները չի պահպանել»,-նշեց Ղամբարյանը՝ ավելացնելով, որ հանձնաժողովը երկու դեպք ունի, որով պաշտոնների անհամատեղելիության վերաբերյալ եզրակացություն է տվել, մեկը՝ Գագիկ Ծառուկյանի գործով, մյուսը՝ Գագիկ Խանդանյանի:

«Կոռուպցիայի կանխարգելման հանձնաժողովը դեռևս չունի հստակ պատկերացում՝ իր իսկ կողմից կիրառման ենթակա օրենքի ընկալման վերաբերյալ և եկել է այստեղ, ուզում է փորձարկումներ անել դատավորների նկատմամբ, թե ինչպես պետք է հասկանանք այս նորմը, ԲԴԽ եկեք մեզ օգնեք: Այդ փորձարկումները կարելի էր անել ուրիշ տեղեր քաղաքական կամ հայեցողական պաշտոնի պարագայում, ոչ թե գալ ու ձեր կոլեգիալ մարմնի չպարզաբանված հարցերը պարզաբանել: Վերագրվում է 3 կետի խախտում, ո՞ր փաստերն են դրա տակ»,- արձանագրեց  Ղամբարյանը:

Ըստ նրա՝ Հանձնաժողովը նիցշեական գերմարդկանց ակումբ չէ, որ կարողանա իրավական արգելքներ բխեցնել և այդ արգելքները փաթաթի հանրային ծառայողների վրա, իսկ չպահպանելու համար էլ միջնորդեին կիրառել պատասխանատվության միջոցներ:

Ղամբարյանը հետաքրքրվեց՝ եթե դատավորը ժառանգություն ստանար բաժնեմաս, պարտավորեցվելու էր օտարե՞լ բաժնեմասը:

Ինչ վերաբերում է քննարկումներին, համաձայն որի՝ կունենանք երկու տեսակի դատավորներ, որոնց մի մասի վերաբերյալ կան բացարձակ արգելքներ՝ չեն կարող բաժնեմասեր ձեռք բերել և դատավորներ, որոնք նախկինում ձեռք են բերել, կարող են տնօրինել իրենց սեփականությունը, Արթուր Ղամբարյանն ընդգծեց, որ եթե Հանձնաժողովը գիտակցեր դատավորի կարգավիճակի միասնականության սկզբունքը, միգուցե նաև գիտակցեր ասվածի կարևորությունը։

«Փաստինֆո»-ի հաղորդմամբ՝ Ղամբարյանի ելույթի ընթացքում միջամտեց ԲԴԽ նախագահի պաշտոնակատար Գագիկ Ջհանգիրյանը՝ նշելով, որ իր տեսակետն արտահայտի ավելի զուսպ համեմատություններ ներկայացնելով, պետական մարմնին չմեղադրի գիտակցելու կամ չգիտակցելու մեջ։ Արթուր Ղամբարյանն էլ արձագանքեց՝ նշելով. «Պարոն Ջհանգիրյան, եթե իմանամ Դուք ոնց եք պատկերացնում իմ ելույթը, իմ ելույթը Ձեր պատկերացված ձևով կգրեի, ես չեմ պատկերացնում»։ Ինչ վերաբերում է Ջհանգիրյանի հայտարարությանը, թե նշի, որ հարցի վերաբերյալ իր կարծիքն է ներկայացնում՝ Ղամբարյանն արձագանքեց՝ «Բա կարո՞ղ է ուրիշի ընկալմամբ եմ ասում։ Հարգելի Խորհրդի անդամներ, եթե այստեղ ասում եմ, ուրեմն ասում եմ՝ իմ ընկալմամբ»։

Հանձնաժողովի նախագահ Հայկուհի Հարությունյանն էլ հորդորեց կարդալ դատավորի վարքագծի կանոնները, կարդա իր կարգավիճակից բխող միջազգային այն սկզբունքները, որով պարտավոր է առաջնորդվել արդարադատության շահը սպասարկող անձը և պատասխանել հարցին՝ արդյոք դատավորը, որը ձեռք է բերում 2,5 մլն դոլար արժողությամբ բիզնես և պաշտոնավարման ժամանակ դրա կառավարման հնարավորություն, արդյոք դա նրա համար ընդունելի՞ է:

«Մասնագիտական ինչ մանիպուլյացիաների էլ փորձեք տրվել, փաստ է եւ արարքը հստակության կարիք չունի: Մի՛ վկայակոչեք փաստեր, որոնք իրականության հետ աղերսներ չունեն»,- նշեց Հարությունյանը:
Դատավոր Գագիկ Խանդանյանը տեղից միջամտեց՝ նշելով. «Ասեք՝ ինչի մասին է խոսքը, շոու մի՛ սարքեք»:

Հարությունյանի հարցին՝ արդյո՞ք ընդունելի է, որ դատավորը ձեռք է բերում 2,5 մլն դոլար արժողությամբ բիզնես և պաշտոնավարման ժամանակ ունենում է դրա կառավարման հնարավորություն, Գագիկ Խանդանյանը նշեց, որ ընդունելի է համարում, որովհետև ՀՀ յուրաքանչյուր քաղաքացի իրավունք ունի ունենալու սեփական գույք:

«Այ, որ ուզեցել եմ ունենալ սեփականություն , դա չի նշանակում, որ Դուք պետք է նման հարց բարձրացնեիք: Եթե չլիներ 2 մլն, այլ լիներ 200 000, Դուք կներկայացնեի՞ք: Իհարկե, կներկայացնեիք, որովհետև Ձեզ պետք էր ներկայացնել»,- նշեց Խանդանյանը՝ հավելելով, որ թեև Հանձնաժողովի նախագահը խոսում է դատավորի վարքագծի կանոնների մասին, բայց չգիտի ինչ է գրված այդտեղ:

Կողմերի դիրքորոշումը լսելուց հետո ԲԴԽ-ն հեռացել է խորհրդակցական սենյակ՝ որոշում կայացնելու: Որոշումը կհրապարակվի հոկտեմբերի 4-ին՝ ժամը 15։30-ին:

Հիշեցնենք, որ Վերաքննիչ քաղաքացիական դատարանի դատավոր Գագիկ Խանդանյանի նկատմամբ կարգապահական վարույթ է հարուցվել՝ «Հանրային ծառայության մասին» օրենքի 31-րդ հոդվածի 1-ին մասի և «Հայաստանի Հանրապետության Դատական օրենսգիրք» սահմանադրական օրենքի 5-րդ հոդվածի 1-ին մասի պահանջների ենթադրյալ խախտման համար։ ՀՀ դատական օրենսգրքի համաձայն՝ դատավորը չի կարող զբաղեցնել իր կարգավիճակով չպայմանավորված պաշտոն պետական կամ տեղական ինքնակառավարման մարմիններում, որևէ պաշտոն` առևտրային կազմակերպություններում, զբաղվել ձեռնարկատիրական գործունեությամբ, կատարել վճարովի այլ աշխատանք, բացի գիտական, կրթական և ստեղծագործական աշխատանքից: Նշված սահմանափակումները կարգավորվում են նաև «Հանրային ծառայության մասին» օրենքով։ Ըստ ԿԿՀ-ի՝ դատավորը հանդիսացել է ՍՊԸ-ներից մեկի սեփականատերը՝ չունենալով ձեռնարկատիրական գործունեություն իրականացնելու իրավունք։

Հեղինակ՝ Իզաբել Սահակյան

Աղբյուր` Փաստինֆո