Փաստ ինֆո

Կոռուպցիայի կանխարգելման հանձնաժողովի նախագահը լսել է դատավոր Մհեր Արղամանյանի որդու՝ ՏԿԵ նախարարի օգնական և դատավորի թեկնածու Դավիթ Արղամանյանի անունը և հայտարարել, որ հայցվող տեղեկատվություն փակ է, մինչդեռ՝ Արղամանյանի հայտարարագրերում էլ նշված է, որ վերջինս զբաղվել է ձեռնարկատիրական գործունեությամբ։ 

«Փաստինֆո»-ի հաղորդմամբ՝ ԲԴԽ-ում շարունակվում է Վերաքննիչ քաղաքացիական դատարանի դատավոր Գագիկ Խանդանյանին կարգապահական պատասխանատվության ենթարկելու մասին կոռուպցիայի կանխարգելման հանձնաժողովի կողմից ներկայացված միջնորդության քննությունը։

Այսօրվա նիստին ներկայացել է Կոռուպցիայի կանխարգելման հանձնաժողովի նախագահ Հայկուհի Հարությունյանը, որը, պատասխանելով դատավոր Գագիկ Խանդանյանի ներկայացուցիչ, պրոֆեսոր Արթուր Ղամբարյանի հարցին, թե արդյո՞ք պաշտոնավարման ժամանակ հանձնաժողովի նախագահը հիշում է, որ Դավիթ Արղամանյանը, որը նշանակվել է ՏԿԵ նախարարի օգնական, միաժամանակ համարվել է նաև անհատ ձեռներեց, նշեց, որ դա հրապարակման ենթակա տեղեկատվություն չէ և եթե կողմն այլ տարբերակով ձեռք է բերել, ապա պետք է քննարկման առարկա դարձվի, թե ինչ տարբերակով է ձեռք բերվել այդ տեղեկությունը։

Արթուր Ղամբարյանն էլ ընդգծեց, որ տեղեկությունը բաց է, հրապարակված է Կոռուպցիայի կանխարգելման հանձնաժողովի կայքում, այդ տեղեկությունն առկա է Արղամանյանի հայտարարագրում, բացի այդ, դիմել են համապատասխան պետական ռեգիստր, որտեղից ստացվել է տեղեկությունը։

«Լսեցիք Դավիթ Արղամանյանի անունը, մտածեցիք, որ փակ տեղեկություն է»,- նշեց Ղամբարյանը՝ հավելելով, որ ընդամենը հարցրել էր, արդյո՞ք իր գործունեության ընթացքում Հարությունյանը նման տեղեկություն ունեցել է, թե ոչ, ինչին ի պատասխան Հայկուհի Հարությունյանը նշեց, որ նման տեղեկություն ունեցել է, սակայն զերծ մնաց պատասխանել հարցին՝ այդտեղ անհամատեղելիության խնդիր կա, թե ոչ։ Հարությունյանը նշեց, որ այդ մասին համապատասխան եզրակացություն տրվել է ԲԴԽ-ին՝ Դավիթ Արղամանյանի՝ որպես դատավորի թեկնածուի հայտարարագրերի ուսումնասիրության արդյունքում, սակայն դա հրապարակման ենթակա չէ։

Հիշեցնենք, որ Վերաքննիչ քաղաքացիական դատարանի դատավոր Գագիկ Խանդանյանի նկատմամբ կարգապահական վարույթ է հարուցվել՝ «Հանրային ծառայության մասին» օրենքի 31-րդ հոդվածի 1-ին մասի և «Հայաստանի Հանրապետության Դատական օրենսգիրք» սահմանադրական օրենքի 5-րդ հոդվածի 1-ին մասի պահանջների ենթադրյալ խախտման համար։ ՀՀ դատական օրենսգրքի համաձայն՝ դատավորը չի կարող զբաղեցնել իր կարգավիճակով չպայմանավորված պաշտոն պետական կամ տեղական ինքնակառավարման մարմիններում, որևէ պաշտոն` առևտրային կազմակերպություններում, զբաղվել ձեռնարկատիրական գործունեությամբ, կատարել վճարովի այլ աշխատանք, բացի գիտական, կրթական և ստեղծագործական աշխատանքից: Նշված սահմանափակումները կարգավորվում են նաև «Հանրային ծառայության մասին» օրենքով։ Ըստ ԿԿՀ-ի՝ դատավորը հանդիսացել է ՍՊԸ-ներից մեկի սեփականատերը՝ չունենալով ձեռնարկատիրական գործունեություն իրականացնելու իրավունք։

Հեղինակ՝ Իզաբել Սահակյան

Աղբյուր` Փաստինֆո