Փաստ ինֆո

Մինչ ԱԱԾ-ն քրեական հետապնդում է սկսել Դավիթ Տոնոյանի և Դավիթ Գալստյանի նկատմամբ՝ մեղադրելով միլիարդավոր դրամների չարաշահումների մեջ, համացանցը քննարկում է, թե ինչու Փաշինյանը ռազմական գերատեսչությունում ստուգումներ չէր սկսել ավելի շուտ։

Պարզվում է՝ վարչապետ Նիկոլ Փաշինյանը չի թույլատրել ՊՎԾ-ին ստուգումներ իրականացնել Պաշտպանության նախարարությունում։

Իրավապաշտպան Արթուր Սաքունցը ֆեյսբուքի իր էջում հարցադրում է արել այն մասին, թե ինչու 2018թ մայիսից հետո հրահանգ չի տրվել վարչապետի կողմից պետական վերահսկողության ծառայությանը, երբ այն ղեկավարում էր Դավիթ Սանասարյանը, ստուգումներ իրականացնել ՊՆ-ում։ Սաքունցը նկատել է, որ ՊՆ-ում կոռուպցիոն ռիսկերի ու դրսևորումների մասին տարիներ շարունակ հարյուրավոր նյութեր են հրապարակվել։

Սաքունցի գրառումը քննարկման հիմք է դարձել, ինչին արձագանքել է նաեւ Պետական վերահսկողության ծառայության նախկին պետ Դավիթ Սանասարյանը՝ ընդգծելով, որ Փաշինյանը թույլ չի տվել ստուգումներ իրականացնել:

«Արթուր ջան, ՊՎԾ պետ նշանակվելուց հետո առաջին պայմանավորվածությունը, որ եղել է Փաշինյանի հետ՝ Պաշտպանության նախարարությունում մեծ թափով ուսումնասիրություն անելուն է վերաբերվել, որի մասին հրապարակային խոսել եմ. տեսանյութերը շատ են համացանցում։ Կարճ ժամանակ անց, Նիկոլ Փաշինյանը թույլ չտվեց, որ ՊՆ մտնենք», - մեկնաբանել է Սանասարյանը։

Հիշեցնենք, որ 2018-ին Սանասարյանը լրագրողների հետ զրույցում հայտնել է, որ առաջինը պետք է մտնեն ՊՆ, ինքը որոշակի տեղեկություններ ուներ ոչ միայն գնումների ոլորտում չարաշահումների, նաև կոռուպցիայի մասին։Թե ինչ ինֆորմացիաների ու չարաշահումների մասին էր խոսքը, Սանասարյանը չէր մանրամասնել։

«Մենք ուզում ենք, որ նոր նախարարն ամբողջովին մաքրված անցնի գործի՝ իրականացնի իր լիազորությունները և մտքում չլինեն այն բոլոր մտահոգությունները, որ թիկունքում արվել են շատ-շատ խախտումներ, օրենքի լուրջ խախտումներ», - ասել էր Սանասարյանը։ Նկատենք, որ Դավիթ Տոնոյանին ներկայումս վերագրվող չարաշահումները վերաբերում են ոչ թե մինչեւ 2018 թ., այլ հենց Նիկոլ Փաշինյանի պաշտոնավարման ժամանակահատվածին՝ 2018-2020թթ.։

Աղբյուր` Փաստինֆո