Փաստ ինֆո

Փաստաբաններ Լուսինե Սահակյանը և Ալեքսանդր Կոչուբաևը կիրականացնեն և ՀՀ նախկին փոխվարչապետ, «Հայաստան» խմբակցության պատգամավոր Արմեն Գևորգյանի պաշտպանությունը՝ դատավոր Աննա Դանիբեկյանի վարույթում քննվող քրեական գործի շրջանակներում։ 

Ինչպես արդեն տեղեկացրել ենք՝ փաստաբան Էրիկ Ալեքսանյանը հրաժարվել է Արմեն Գևորգյանի պաշտպանությունից և լքել դատական նիստերի դահլիճը՝ պայմանավորված դատավոր Աննա Դանիբեկյանի գործողություններով։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, ընթացում է ՀՀ երկրորդ նախագահ Ռոբերտ Քոչարյանի և Արմեն Գևորգյանի գործով դատական նիստը, որի ընթացքում Արմեն Գևորգյանի պաշտպանությունն իրականացնելու նպատակով նոր փաստաբաններ ներգրավվեցին։ Դատական նիստին չէր ներկայացել Ալեքսանդր Կոչուբաևը՝ դատարանին ներկայացված դիմումով տեղեկացնելով, որ չի կարող մասնակցել այսօրվա դատական նիստին՝ նախապես նշանակված դատական նիստով պայմանավորված, միևնույն ժամանակ, խնդրեց ժամանակ տրամադրել՝ գործի նյութերին ծանոթանալու համար։

Փաստաբան Լուսինե Սահակյանը նշեց, որ բազմաթիվ գործերով ինքն արդեն վաղուց ստանձնել է Արմեն Գևորգյանի պաշտպանությունը, ներկայացուցիչ է հանդիսանում նաև քաղաքացիական գործերով, սակայն սույն գործով չէր ներգրավվել, քանի որ նախկինում շահերի բախում կար՝ նկատի ունենալով այն հանգամանքը, որ ինքը ժամանակին «Մարտի 1»-ի վերաբերյալ քրեական գործերով ներկայացրել է այլոց շահերը, այդ թվում՝ Նիկոլ Փաշինյանի։

«Նկատի ունենալով, որ իմ պաշտպանյալին դեռևս «Մարտի 1»-ի իրադարձությունների վերաբերյալ մեղադրանք կար առաջադրված, Քրեական դատավարության օրենսդրությունը հնարավորություն չէր տալիս մասնակցելու անձի պաշտպանությունը միայն մեղադրանքի մի մասով, ուստի, ես չեմ ներգրավվել այս գործով»,- նշեց Սահակյանը՝ հավելելով, որ, նկատի ունենալով այն հանգամանքը, որ դատախազները վերաքննիչ բողոք են ներկայացրել քրեական հետապնդումը դադարեցնելու որոշման դեմ և դեռևս չգիտենք, թե ինչ ընթացք կունենա, ապա փաստաբանը նախապես հայտնեց, որ ինքը շահերի բախում տեսնում է և եթե դատախազների բողոքը բավարարվի, ինքը պաշտպանելու է Արմեն Գևորգյանին այս պահին առկա մեղադրանքներով։

Մեղադրող Պետրոս Պետրոսյանը դիրքորոշում հայտնեց, որ նախկինում նմանաբնույթ հարց բարձրացվել է՝ փաստաբան Ինեսսա Պետրոսյանի ներգրավման հետ կապված և որևէ խնդիր չի եղել, սակայն այս պարագայում դիրքորոշումները հստակ չեն։

«Պաշտպանն ինչպե՞ս է պատկերացնում իր ներկայացրած ենթադրյալ տարբերակի դեպքում՝ պաշտպանությունը մի մասով ներկայացնելը, մի մասով՝ ոչ։ 300.1-րդ հոդվածի վերաբերյալ երբևէ ելույթ ունենալու՞ է, թե ոչ»,-հետաքրքրվեց մյուս դատախազը՝ Գևորգ Բաղդասարյանը։

Անդրադառնալով դատախազի պնդումներին՝ Արմեն Գևորգյանն արձանագրեց, որ վերջին դատական նիստը տեղի է ունեցել 21 օր առաջ, որն ընդհատվել և չի կայացել, որովհետև Էրիկ Ալեքսանյանին թույլ չեն տվել ներկայացնել դատավորին ինքնաբացարկ հայտնելու մասին միջնորդություն, որի արդյունքում փաստաբանը հրաժարվել է։ Գևորգյանը նշեց, որ մինչ այդ ցանկություն չի ունեցել, որ այս գործի շրջանակներում Ալեքսանյանից բացի այլ պաշտպան ներգրավվի, այդ անհրաժեշտությունն առաջացել է սեպտեմբերի 7-ից հետո։

«Այնպես չէ, որ հերթ են կանգնած, բոլորն ուզում են գալ և այս դատարանում իմ շահերը պաշտպանել՝ տեսնելով, թե այստեղ ինչ է կատարվում»,- նշեց Գևորգյանը։

Դատարանը որոշեց փաստաբան Լուսինե Սահակյանին որպես պաշտպան ներգրավելու մասին։

Հիշեցնենք, որ նշված դրվագով Ռոբերտ Քոչարյանը մեղադրվում է առանձնապես խոշոր չափերով կաշառք ստանալու, իսկ Արմեն Գևորգյանը՝ առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո