Փաստ ինֆո

Պատերազմից մեկ տարի անց դասեր չեն քաղվել։ Լրագրողների հետ զրույցի ժամանակ այս մասին ասաց ԼՀԿ ղեկավար Էդմոն Մարուքյանը, որը ևս այցելել էր «Եռաբլուր» զինվորական պանթեոն։

Էդմոն Մարուքյանի խոսքով Հայաստանում առկա հանրային քննարկումները մտել են մի այնպիսի հուն, որտեղ բոլորը կեղծ են.
«Անկեղծությունն ամբողջությամբ բացակայում է հանրային քաղաքական քննարկումներից, ինչը նշանակում է, որ մեկ տարի անցել է և ընդհանրապես դասեր քաղելու մասին խոսակցություններն անիմաստ են»,-ասաց Էդմոն Մարուքյանը։

Վերջինս նկատեց՝ հարձակումը տեղի է ունեցել թուրքա-ադրբեջանական տանդեմի ծրագրով ամբողջ աշխարհի աչքի առաջ, և մեր պետականության, ինքնիշխանության և տարածքային ամբողջականության դեմ ուղղված սպառնալիքներն այսօր էլ չեն վերացել, կախված են մեր երկրի գլխին։

«Մի իրավիճակ ունենք, երբ ամեն օր քննարկում ենք, թե նոր ինչ իրավիճակ կարող ենք ունենալ»,-ասաց Էդմոն Մարուքյանը։

Հարցին՝ տեղյա՞կ է, թե Նիկոլ Փաշինյանը և Էրդողանը դրական ինչ ազդակներ են միմյանց փոխանցում, Էդմոն Մարուքյանն ասաց, որ տեղեկություններ չունի, քանի որ այլևս գաղտնի ինֆորմացիայի չեն տիրապետում։

«Իմ ընկալումն այն է, որ ընդհանրապես հարևան երկրների հետ որևէ ձևով դիալոգ սկսելուն միտված քայլեր են փորձում անել, բայց որքանով են այդ քայլերը ճիշտ կազմակերպված, դա առանձին քննարկելու թեմա է»,-ասաց Էդմոն Մարուքյանը։

Աղբյուր` Փաստինֆո