Փաստ ինֆո

Մենք երբեք պետք է չհամակերպվենք այս պարտության հետ, այս ծնկի եկած վիճակից պետք է դուրս գանք: Այս մասին լրագրողների հետ զրույցում ասաց «Հայաստան» խմբակցության պատգամավոր Իշխան Սաղաթելյանը:

«Այսօրվա մեր հիշատակի երթն ունի այդ խորհուրդը: Այո, մենք ոտքի ենք կանգնելու, մենք տեր ենք մեր երկրին, հայրենիքին և մեր սուրբ նահատակների թափած արյունը՝ հանուն հայրենիքի՝ իզուր չի անցնելու, իրենց գործը շարունակելու ենք: Մենք ոտքի ենք կանգնելու, համախմբվելու ենք և դուրս ենք գալու այս վիճակից»,- նշեց Սաղաթելյանը:

Սաղաթելյանը նշեց, որ երկրում ստեղծված ճգնաժամը շարունակում է մնալ չհաղթահարված, որովհետև ճգնաժամի ստեղծողները և երկիրն աղետի բերած իշխանությունները մնում են իշխանության: Իշխան Սաղաթելյանն ընդգծեց, որ այսօր մեր երկիրը վտանգի տակ է, Հայաստանում սպառնացող վտանգներն օր օրի խորանում են, իսկ օրվա իշխանություններն այդ վտանգներն ի վիճակի չէ չեզոքացնել:

«Պետք է կանխենք Հայաստանի թրքացումը, երկիրը պետք է դուրս գա այս իրավիճակից, պարտավոր ենք հաղթահարել այս ճգնաժամը, իսկ այդ ճանապարհին կա մեկ խոչընդոտ՝ այսօրվա իշխանությունն է, որոնց հեռացումն անհրաժեշտություն է»,- նշեց Սաղաթելյանը՝ նշելով, որ քաղաքական բնույթի հարցերին չի ցանկանում պատասխանել, քանի որ այսօր հավաքվել են՝ զոհված զինծառայողների հիշատակին հարգանքի տուրք մատուցելու:

Աղբյուր` Փաստինֆո