Փաստ ինֆո

Երեկ դիմում ենք մուտքագրել ՍԴ, որը վերաբերվում էր Առողջապահության նախարարի հրամանին՝ թեստավորվելու պարտադիր պահանջի մասով: Այս մասին այսօր լրագրողների հետ զրույցում ասաց «Հայաստան» խմբակցության պատգամավոր Արամ Վարդևանյանը:

Նրա խոսքով՝ ԱՆ նախարարիի հրամանը ռիսկեր է պարունակում, քանի որ ցանկացած անձի համար պարտականություններ է նախատեսում, մինչդեռ սահմանադրությամբ արձանագրված է, որ պարտականություններ կարող են լինել միայն օրենքով՝ ոչ թե նախարարի հրաման.

«Ունենք իրավիճակ, երբ մեր միջոցով երկու շաբաթը մեկ պետք է ՊՇՌ հետազոտում անցնենք կամ պետք է գնանք պատվաստվենք: Պատվաստումը յուրաքանչյուր անձի գիտակցված որոշումն է, թող մարդկանց համոզեն՝ ինչի՞ համար է անհրաժեշտ պատվաստումը, բայց դա ստիպելով չի կարող լինել: Հարկադրանք երբեք չի կարող լինել, հատկապես՝ պատվաստումների դեպքում, քանի որ դա յուրաքանչյուր անձի ֆիզիկական անձեռնմխելիությունն է: Ինչո՞ւ պետք է մեր հանրությունը լրացուցիչ ծախս անի ՊՇՌ թեստի համար, թող պետությունը այդ ծախսը կատարի»,-ասաց պատգամավորը և հայտնեց, որ դիմել են ՍԴ, որպեսզի կասեցվի այս հրամանը:

Անդրադառնալով երեկ խորհրդարանում ընդունված համայնքների խոշորացման վերաբերյալ նախագծին՝ Վարդևանյանը նկատեց, որ
նման ծավալուն, պատասխանատու, լուրջ օրենքների փաթեթը մի քանի ժամվա ընթացքում ընդունվեց.

«Սա նաև ԱԺ հեղինակության տեսանկյունից բացասական երևույթ է: Նախագահը պետք է որոշի՝ ստորագրի այդ օրենքը, չստորագրի, թե դիմի ՍԴ: Այս օրենսդրական փաթեթի սահմանադրականության խնդիրը շատ հստակ է: Կարծում եմ՝ այլ տարբերակ, քան հանրապետության նախագահի դիմումը ՍԴ, ուղղակի չկա: Եթե նա աչք փակի այդ ապօրինության վրա, մեր կողմից է դիմում ներկայացվելու ՍԴ»,-ասաց Վարդևանյանը:

Պատգամավորը նշեց նաև, որ դիմելու են ՍԴ պաշտոնյաների պարգևավճարների վերանայման հարցով. «Մենք խոսում ենք քաղաքական պաշտոնների մասին՝ պատգամավոր, նախարար, փոխնախարար, նրանք չպետք է ստանան պարգևավճար, իսկ ստանալու դեպքում պետք է չափորոշիչներ լինեն»,-նշեց պատգամավորը:

Աղբյուր` Փաստինֆո