Փաստ ինֆո

Հայաստանի դեմոկրատական կուսակցությունը չի ողջունել Տիգրան Արզաքանցյանի մասնակցությունը Նիկոլ Փաշինյանի և արտախորհրդարանական ուժերի հետ հանդիպումներին։ Այս մասին «Փաստինֆո»-ին հայտնել է ՀԴԿ նախագահ Արամ Սարգսյանը։

Ինչպես արդեն տեղեկացրել ենք՝ Արզաքանցյանն այսօր ասուլիսի ժամանակ հայտարարել է, որ դուրս է գալիս Հայաստանի դեմոկրատական կուսակցության շարքերից՝ դժգոհելով, թե Ա.Սարգսյանը հանդիպումներ է ունեցել դեսպանների հետ, որոնց մասին ինքը տեղյակ չի եղել։ Ավելին՝ հայտարարել է, թե ինքը համագործակցում է արտախորհրդարանական ուժերի հետ, որը, ինչպես հայտնի է, ստեղծվել է Նիկոլ Փաշինյանի նախաձեռնությամբ։

«Փաստինֆո»-ի հետ զրույցում Դեմոկրատական կուսակցության ղեկավար Արամ Սարգսյանը հայտնել է, որ տարաձայնությունների հիմնական պատճառը եղել է հենց Տիգրան Արզաքանցյանի մասնակցությունը Նիկոլ Փաշինյանի և արտախորհրդարանական ուժերի հետ հանդիպմանը։

«Մենք մի քանի անգամ ասել ենք, որ ինքը չի ներկայացնում կուսակցության դիրքորոշումը, երբ հանդիպում է վարչապետին կամ մասնակցում է այդ հանդիպումներին: Դա է եղել ընդամենը մեր, այսպես ասած, տարաձայնությունը: Կուսակցությունը հստակ է հայտարարել է, որ ինքը չի մասնակցում և որևէ մեկին չի լիազորել, որպեսզի իր անունից մասնակցի այդ հանդիպումներին: Տարաձայնություն չէ, ուղղակի ինքն իր դիրքորոշումն է ներկայացրել, բայց այդտեղ ներկայացրել են իրեն որպես մեր կուսակցության ներկայացուցիչ, մենք դրա վերաբերյալ հայտարարություն էինք արել:Մենք իրեն ուղղակի կարող ենք հաջողություն մաղթել»,-ասաց Սարգսյանը:

Հիշեցնենք, որ արտախորհրդարանական ուժերի աշխատանքային խմբի մեջ են մտնում հիմնականում այն ուժերը, որոնց քաղաքական ակտիվությունը կապվում է Նիկոլ Փաշինյանի շահերի սպասարկման անհրաժեշտության հետ։

Աղբյուր` Փաստինֆո