Փաստ ինֆո

Նախորդ օրը Հայաստանում գրանցվել է կորոնավիրուսի 906 նոր դեպք: Այս մասին կառավարության նիստի մեկնարկին ասաց ՀՀ առողջապահության նախարար Անահիտ Ավանեսյանը:

Նախարարը նշեց, որ այս պահին կորոնավիրուսով հիվանդների բուժման համար 18 բժշկական կազմակերպություններում ծավալված է 2156 մահճակալ, որից 206-ը զբաղված է:

«Մեր մահճակալային կարողությունների 85 տոկոսն արդեն ծավալված է, և մենք առաջիկայում աշնան հետ կապված այլ հիվանդություններով ևս ունենք հիվանդացության աճ, ուստի առողջապահական համակարգի վրա լարվածությունը բավական մեծ է»,-նշեց Անահիտ Ավանեսյանը:

Վերջինս ներկայացրեց նաև պատվաստումների ցուցանիշները՝ նշելով, որ վերջին երկու օրերին պատվաստումների շեշտակի աճ է գրանցվել: Սեպտեմբերի 22-ին իրականացվել է 9924 պատվաստում, իսկ սեպտեմբերի 23-ին՝ 8440 պատվաստում:

«Այս պահին ունենք 11470 քաղաքացի, որոնք կորոնավիրուսով են վարակված և նրանցից 286-ը պատվաստված քաղաքացիներ են: Սա իհարկե բնական է, նորմալ է: Պատվաստումը 100 տոկոսով չի բացառում վարակման ռիսկը, այն շեշտակի նվազում է, բայց ամենակարևոր նպատակն այն է, որ այս քաղաքացիները հիվանդությունը տանում են ավելի թեթև»,-ասաց Անահիտ Ավանեսյանը:

Աղբյուր` Փաստինֆո