Փաստ ինֆո

Պատերազմի հետևանքով Արցախից տեղահանված հադրութցիներն այսօր ՀՀ աշխատանքի և սոցիալական հարցերի նախարարության շենքում հանդիպում են ունեցել նախարարի, նրա տեղակալների, ինչպես նաև՝ Արցախի կառավարության ներկայացուցիչների հետ՝ քննարկելու բնակարանների հարցը, սակայն ավելի քան մեկ ժամ տևած հանդիպումը մնացել է անարդյունք. հադրութցիները հուզող հարցերի լուծման մասին պատասխաններ չեն ստացել։ Ընդ որում՝ հադրութցիներն ահազանգում են, որ իրենց արդեն հանրակացարաններից հեռացնում են, իսկ բնակարան վարձակալել չեն կարող, սոցիալական աջակցություն պատշաճ կարգով չեն ստանում, առջևում էլ ձմեռ է։

Հադրութցի Արթուր Ստեփանյանը լրագրողների հետ զրույցում նշեց, որ իրենց հուզում է բնակարանային հարցը, որին ոչ ոք լուծում ոչ ոք տալիս, կոնկրետ պատասխաններ չեն կարողանում տալ։

«Եկել են այն եզրակացության, որ Հադրութի, Շուշիի բնակիչների մասով ապահովելու են Արցախի Հանրապետությունում, իրենց ասելով՝ բնակարանները սարքելու են երեք տարում, բայց արդեն մեկ տարի անցել է, ոչ մի դրական քայլ չենք տեսնում»,- նշեց նա՝ հավելելով, որ դեռևս մեկ ամիս առաջ այդ հարցով դիմել են ՀՀ վարչապետին, բայց դիմումին պատասխան առ այս պահը չի ստացվել։

Նրա փոխանցմամբ՝ այսօր Արցախի Տարածքային կառավարման և ենթակառուցվածքների նախարար Խանումյանը հայտնել է, որ այսօրվա դրությամբ պլանավորված է, որ մինչև տարեվերջ 500 բնակարան շահագործման հանձնելու, մինչդեռ, այդ 500 բնակարաններից 350-ի կառուցումը երեք տարի առաջ է սկսվել։

Աղբյուր` Փաստինֆո