Փաստ ինֆո

Հայաստանի սահմանամերձ բնակավայրերում կյանքը չի կարող անվտանգ լինել: Մարդիկ դժվարություններ ունեն իրենց ապագան այդ հատվածներում կառուցելու հարցում, մարդիկ ուղղակի անվտանգ միջավայր են ուզում, իսկ այդ միջավայրը մենք չունենք: Այս մասին այսօր լրագրողների հետ զրույցում ասաց ԱԺ մարդու իրավունքների պաշտպանության և հանրային հարցերի հանձնաժողովի նախագահ Թագուհի Թովմասյանը:

Նա նշեց, որ ադրբեջանցիները Գեղարքունիքի մարզի մի շարք բնակավայրերում խոտհարք են այրել, իսկ դրանից առաջ էլ ադրբեջանցիները հափշատել էին գյուղացիների անասունները.

«Ստացվում է, որ մարդիկ անասուն չունեն, հիմա էլ խոտ չունեն, որ անասունների ձագերին կերակրեն: Ես Կառավարության ծրագրի քննարկման ժամանակ հարց տվեցի վարչապետին սրանց փոխհատուցման վերաբերյալ, սակայն ուղիղ պատասխան այդպես էլ չստացա: Մարդիկ իրենց կամքից անկախ կորցրել են եկամտի միակ աղբյուրը, նրանք հիմա զրկված են նաև անասնապահություն իրականացնելու իրավունքից, ի՞նչով ապրի գյուղացին»,-ասաց Թովմասյանը:

Անդրադառնալով Գորիս-Կապան ավտոճանապարհին ադրբեջանցիների կողմից անցակետ տեղադրելուն, պատգամավորն ասաց, որ անհասկանալի է, թե ի՞նչ իրավակարգավորմամբ, միջազգային կամ բանավոր ի՞նչ պայմանավորվածությամբ է Ադրբեջանակն զինուժը վերահսկողություն սահմանել Գորիս-Կապան ավտոճանապարհին.

«Որևէ փաստաթղթում մենք չենք տեսնում դա:Իշխանության ներկայացուցիչները վկայակոչում են քարտեզներ, թե իբր դրանց հիման վրա է ադրբեջանական զինուժը ներխուժել մեր տարածք և դա իրենց տարածքն է, ես չեմ կարողանում հասկանալ , թե ինչու՞ է հենց այդ մի քարտեզը վերցվում որպես օրինակ, իսկ այն քարտեզները, որոնք մեր օգտին են, դրանք կիրառության մեջ չեն դրվում»,-ասաց Թովմասյանը և հավելեց.«Ես չեմ հասկանում՝ ինչու՞ մեր է իշխանությունը շարունակում պաշտպանել ադրբեջանական շահը և անընդհատ ադրբեջանական գործողություններն արդարացնել: Կառավարությունը առաջանահերթ պետք է հաշիվ տա իրեն, թե ինչո՞ւ է նման իրավիճակում անում սխալներ, որոնք նույնիսկ երկար տարիներ հետո, որպես Հայաստանի Հանրապետություն, չենք կարողանալու շտկել, քանի որ ճակատագրական սխալներ են»:

Պատգամավորը նաև անհեթեթ որակեց ԱԱԾ հաղորդագրությունն այն մասին, թե ՀՀ քաղաքացիները Գորիս-Ճանապարհ ավտոճանապարհով երթևեկելիս մոլորվել են.

«Ես դրա իմաստը չհասկացա: Դա ուղիղ ճանապարհ է, անհնար է այդտեղ մոլորվել, նշանակում է՝ քեզ պետք է կանգնեցնեն, առևանգեն, հետևաբար, ծաղրել ողջ հասարակությանը և ասել, թե մոլորվել են, սա լուծում չէ, որպես ԱԱԾ նրանք պարտավոր են մեր անվտանգությունն ապահովել, այլ ոչ թե ադրբեջանական զինուժի գործողություններն արդարացնել»,-ասաց Թագուհի Թովմասյանը:

Աղբյուր` Փաստինֆո