Փաստ ինֆո

Առողջապահության նախարարի հրամանով՝ որոշակի պարտավորություն է սահմանվել գործատուի և աշխատողների համար: Մենք լավ գիտենք, որ Սահմանադրությամբ երաշխավորված է համաչափության սկզբունքը՝ ցանկացած նորմատիվ ակտ հրապարակելիս պետք է համաչափության սկզբունք պահպանվի: Այս մասին կորոնավիրուսային համավարակով պայմանավորված խստացումների թեմայով խորհրդարանական լսումների ժամանակ ասաց Փաստաբանների պալատի նախագահ Արա Զոհրաբյանը՝ անդրադառնալով հոկտեմբերի 1-ից ուժի մեջ մտնող նոր հրամանին, որով բոլոր աշխատողներից պահանջվում է ամիսը 2 անգամ պարտադիր ՊՇՌ թեստ հանձնել կամ պատվաստվել:

Նա պնդեց, որ նախագծում տարբերակված մոտեցում կա պատվաստվածների և չպատվաստվածների միջև, քանի որ պատվաստված աշխատակիցներից չի պահանջվում ՊՇՌ թեստ, մինչդեռ, ինչպես Առողջապահության նախարարը նշեց, պատվաստումը չի կարող ամբողջովին կոտրել վարակի շղթան: Արա Զոհրաբյանը հարց ուղղեց Արդարադատության փոխնախարար Սուրեն Գրիգորյանին.

«Պատվաստվածից  չպահանջելով ՊՇՌ թեստ՝ պայման է ստեղծվում, որ նա վարակակիր լինի և վարակի ՊՇՌ թեստով աշխատանքի եկած աշխատակցին: Արդյո՞ք խտրական վերաբերմունք չի դրսևորվում պատվաստվածների և չպատվաստվածների»:

Նախարարն էլ նշեց, որ ոչ դիմակ կրելը, ոչ պատվաստումը,  ոչ էլ ՊՇՌ թեստը միանշանակորեն չեն կտրում վարակի շղթան.

«Երբ խոսում ենք որևէ կանխարգելիչ միջոցի շղթա կտրելուց, մենք խոսում ենք դրա՝ հավանական լինելուց: Այսինքն, երբ մարդը դիմակ կրում է, պատվաստված է դա մեծ հավանականությամբ կոտրում է վարակի շղթան »,-ասաց փոխնախարարը:

Արա Զոհրաբյանն ընդգծեց, որ պատժիչ քաղաքականությունը չպատվաստվածների նկատմամբ անթույլատրելի է և, պնդեց, որ  տարբերակված մոտեցում է ցուցաբերվում պատվաստվածների և չպատվաստվածների նկատմամբ.

«Մարդու իրավունքի սահմանափակում եմ տեսնում, համաչափության, խտրականության սկզբունքի արգելքները խախտված են, և մենք այստեղ արդեն աղմուկ ենք բարձրացնելու»,-հայտարարեց Արա Զոհրաբյանը:

Աղբյուր` Փաստինֆո