Փաստ ինֆո

Գործող իշխանությունները Ադրբեջանին են նվիրել մեր ռազմավարական նշանակություն ունեցող ճանապարհները, Որոտանում ստեղծված իրավիճակը նման քաղաքականության հետևանք է: «Փաստինֆո»-ի հետ զրույցում ասաց անվտանգության հարցերով փորձագետ Արմեն Մանվելյանը:

Հիշեցնենք, որ տևական ժամանակ է Ադրբեջանը անցակետ է դրել մեր ինքնիշխան տարածքում՝ Գորիս-Կապան ճանապարհի Որոտանի հատվածում. Ճանապարհի հարկ պահանջում իրանցի վարորդներից, վիրավորում, նաեւ՝ գերեվարում հայ վարորդներին։ Արդյունքում՝ ՀՀ քաղաքացիներն այլեւս խուսափում են անցնել այդ ճանապարհով միայնակ՝ նրանց ուղեկցում են ռուս սահմանապահներն ու ՀՀ ԱԱԾ-ի աշխատակիցները։

Փորձագետի արձանագրմամբ՝ Ադրբեջանը ցանկանում է դժվարություններ ստեղծել Հայաստանի համար հատկապես՝ Սյունիքից, որն իրենց համար ռազմավարական նշանակություն ունի: Ըստ զրուցակցի՝ սրանով Ադրբեջանը հարվածում է Հայաստանի տնտեսական, քաղաքական, անվտանգային շահերին.

«Այստեղ զարմանալու բան չկար, սա Ադրբեջանի կողմից հաշվարկված և սպասելի քայլ էր, պետք է զարմանանք՝ ինչո՞ւ մենք իրենց նվիրեցինք մեր ռազմավարական ճանապարհը:Նոյեմբերի 9-ի եռակողմ հայտարարության մեջ ասվում էր, որ զորքերը պետք է կանգնած մնային այնտեղ, որտեղ հրադադարի պահին կանգնած էին, հետագայում հետնահանջ եղավ, որն արդեն պաշտոնական Երևանի նախաձեռնությունն էր»,-ասաց Մանվելյանը:

Ըստ նրա՝ Ադրբեջանը ցանկանում է մեծ տնտեսական վնաս հասցնել Հայաստանին՝ Իրանից դեպի Հայաստան բեռնափոխադրումը հնարավորինս կանգնեցնելով.

« Իրանից Հայաստան տասնյակ հազարից ավելի մեքենա է անցնում, ըստ այդմ եկամուտ է գալիս, հիմա Հայաստանը զրկվելու է այդ եկամուտներից»,-ասաց նա և հավելեց, որ հակառակորդը ճնշումներ է գործադրում Հայաստանի վրա, որպեսզի թելադրի իր օրակարգը՝ մասնավորապես Սյունիքով ճանապարհ տրամադրելու հարցում.

«Նրանք պահանջում են նաև Զանգեզուրի միջանցքի բացում, որն էլ անվտանգային լուրջ խնդիրներ է առաջացնելու Հայաստանի համար, ինչպես նաև ինքնիշխանության համար: Առանց այն էլ Հայաստանի ինքնիշխանությունը շատ ցածր մակարդակի վրա է, եթե Զանգեզուրի միջանցքն էլ բացվի դա թուլացնելու է Հայաստանի ոչ միայն տնտեսական համակարգը, այլ նաև ողջ անվտանգային համակարգը, սա, ի վերջո, հնարավոր պատերազմի պատճառ կարող է հանդիսանալ»,-ասաց Արմեն Մանվելյանը:

Փորձագետի համոզմամբ՝ այս իրավիճակը նաև անպատժելիության հետևանք է.

«Հակառակորդը շատ լավ հասկանում է, որ նման սադրանքներով թուլացնում է Հայաստանը, երբ նրանք տեսնում են, որ Հայաստանի իշխանությունները ոչինչ չեն ձեռնարկում դրանք կանխելու համար, ավելի ու ավելի շատ են ցանկանում ճնշում բանեցնել, որովհետև հայկական կողմը, փաստորեն, հակված է անընդհատ զիջումների գնալ»,-ասաց Արմեն Մանվելյանը;

Նիկոլ Փաշինյանը և իշխանության մի շարք ներկայացուցիչներ իրենց ելույթներում հայկական բնակավայրերի ադրբեջանական անվանումներն են օգտագործում, բացի դա, հիմնավորում են, թե Գորիս-Կապան ճանապարհի այն հատվածը, որտեղ ադրբեջանցիներ են ապօրինի տեղակայվել, դրանք ըստ ԽՍՀՄ քարտեզի, սովետական Ադրբեջանի տարածքներ են եղել:

Հարցին՝արդյո՞ք այս քայլերով մեր իշխանությունը չի լեգտիմացնում հակառակորդի սադրիչ քայլերը, փորձագետն ասաց.

«Իրենք մի մոլորություն են տարածում, որ եթե վերականգնենք Սովետական Հայաստանի, Սովետական Ադրբեջանի տարածքները, ապա դրանից հետո կհաստատվի խաղաղության դարաշրջան, սա կեղծիք է և սուտ: Եթե սահմանագծման և սահմանազատման աշխատանքներ տանենք, նրանք մեկ է շարունակելու են կրակել հայկական գյուղերի ուղղությամբ, առևանգել մարդկանց, որևէ խաղաղություն չի լինելու»,-ասաց Մանվելյանը:

Վերջերս Թուրքիայի նախագահը հայտարարեց, թե Նիկոլ Փաշինյանն իրեն, Վրաստանի վարչապետի միջոցով, գաղտնի հանդիպման առաջարկ է արել:

Թե ի՞նչ սպասել այս հանդիպումից և արդյո՞ք Հայաստանը պատերազմից հետո ունեցած թույլ դիվանագիտական ռեսուրսներով կարող է բանակցել Թուրքիայի հետ, Արմեն Մանվելյանն ասաց.

«Թուրքիայի նախագահի դիմելու ձևը և տոնը վկայում են, որ Թուրքիան, ինչպես նաև Ադրբեջանը, Հայաստան պետությունը և Հայաստանի իշխանությանը լուրջ չեն ընդունում:

Էրդողանը երբ խոսում էր հանդիպման առաջարկի մասին, նրա խոսքում որևէ հարգանքի նշույլ չկար, անգամ Հայաստանի վարչապետի անունը չէր տալիս: Սա ոչ միայն վարչապետին է վիրավորանք, այլ՝ մեզ բոլորիս»,-ասաց փորձագետը և հավելեց, որ նվաստացած և ստորացած վիճակում Հայաստանի իշխանությունները չեն կարող Հայաստանի շահերից բխող բանակցություններ վարել:

Աղբյուր` Փաստինֆո