Փաստ ինֆո

«Եռաբլուրում մեր տղերքը ու սահմանում կանգնած տղերքը, մենք բոլորս պայքարել ենք անկախության համար»․ ԵԿՄ վարչության նախագահ Սասուն Միքայելյանը ՀՀ անկախության 30-ամյակին այցելել էր Եռաբլուր։

«Եկեք չխառնենք անկախությունը ուրիշ բանի հետ։ Սա արժեք է, որի մասին բոլոր ազգերն են երազել։ Արդեն երրորդ հանրապետությունն է գոյատևում 30 տարի և հավերժ պիտի մնա մեր համախմբվածությամբ, ժողովրդի միասնության շնորհիվ։ Մենք անկախ ու ճանաչված պետություն ենք, մեր անկախությունը պետք է ճանաչենք»։

Միքայելյանը նշեց, որ որպես ԵԿՄ նախագահ համալրումներ է անում, որ անհրաժեշտության դեպքում կանգնեն բանակի կողքին։

«Երիտասարդներով ենք համալրում, որպեսզի աստված մի արասցե ոտնձգություն լինի ՀՀ պետական սահմանի դեմ, գնանք կանգնենք բանակի կողքին։ Ոտնձգություններ կան, կլինեն։ Առավել ևս ավելի ծանր վիճակի մեջ ենք»։

ԵԿՄ նախագահն ասաց, որ այսօր առավել ևս քան երբևէ, պետք է համախմբված լինել։ Անդրադառնալով Փաշինյանի հայտարարությանը, թե ընդդիմությունը շեղում է խաղաղ զարգացման օրակարգից, Միքայելյանը նշեց, որ խաղաղ բանակցային գործընթաց է ընթանում։

«Գնում է բանակցային գործընթաց խաղաղ ձևով։ Այսօր մենք մեր պետությունը, զինված ուժերը էդ աստիճան հզոր չենք, որ կարողանանք զենքի կամ ինչ որ միջոցներով արդյունքի հասնենք, բայց դա չի նշանակում, որ պետք է ամեն ինչի համաձայնենք։ Դրա համար հզորանալ է պետք, դա ենք անում երկրապահներս, առավել ևս մեր թշնամու կողմից գերեվարվածներ կան։ Մենք գիտենք, որ մի օր, մի ժամ այնտեղ մնալը ինչ է նշանակում»։

Անդրադառնալով Սպարապետ Վազգեն Սարգսյանին քննադատողներին և մեղադրողներին, թե ժամանակին սխալներ է գործել, Միքայելյանը խորհուրդ տվեց նայել անցած ճանապարհը, նոր խոսել։

«Խաչատուր Սուքիասյանը շատ փոքր մարդա, որ Վազգեն Սարգսյանին քննադատի։ Մարդ պետք է իր անցած ուղղին նայի, հետհայացք գցի իր անցած ճանապարհին, անկախության պատմության մեջ արած գործին, նոր Վազգեն Սարգսյանից խոսի։ Նա այն մարդն է, որ ազատագրեց 8000 քմ տարածք։ Նման կարգի մարդիկ փոքր են, որ քննադատեն Սարգսյանին»։

Անդրադառնալով այսօր երեկոյան տեղի ունենալիք տոնակատարությանը, Միքայելյանը նշեց, գունագեղ բառը չի հասկանում, բայց անկախության տոնը պարտադիր պետք է նշել։

«Եթե անկախություն չնշենք, նշանակում է հանձնվում ենք։ Մենք նորից հետ կդառնանք այնտեղ, որտեղ մեր տղերքը նահատակվեցին, դա մեր սրբավայրն է»։

Աղբյուր` Փաստինֆո