Փաստ ինֆո

Այսօր ՀՀ ոստիկանությունը, բացառությամբ որոշ ստորաբաժանումների, որոնք քրտնաջան աշխատանքներ են կատարում՝ հանուն ՀՀ-ում մարդու իրավունքների պաշտպանության, իրավակարգի ամրապնդման, մեծ մասը լծվել են ապօրինություններին և միակ նպատակն այն է, թե ինչպես պաշտպանեն Նիկոլ Փաշինյանի իշխանությունը՝ գոնե մեկ օր ավելի։ Այս մասին հրավիրված մամուլի ասուլիսին ասաց ԱԺ նախկին պատգամավոր Գևորգ Պետրոսյանը։

Անդրադառնալով նախօրեին Շառլ Ազնավուրի հրապարակում ոստիկանության գործողություններին՝ Պետրոսյանը նշեց, որ ոստիկանության գործողությունները ոչ մի ընդհանրություն չունեն այն նպատակների, սկզբունքների, գործելակերպի հետ, որոնք ամրագրված են ՀՀ գործող օրենքներում։

«Ոստիկանությունում դեռևս գործում է Խորհրդային ժամակներից ժառանգված պետի պաշտանմունքի ինստիտուտը։ Կարևոր չէ, թե ժողովուրդն ինչ է անում, կարևորը՝ պետն ասում է»,- նշեց Պետրոսյանը։

Ինչ վերաբերում է իր ձերբակալմանը, Պետրոսյանը նշեց, որ ոստիկանից պահանջել է ներկայանալ, սակայն վերջինս փախել է։ Ըստ Պետրոսյանի՝ նման ոստիկանը, չի կարող աշխատել. «Իր հետևից գնալու եմ, թող նկատի ունենա, նա չպետք է աշխատի համակարգում»,- նշեց Պետրոսյանը։

Պետրոսյանը հայտնեց, որ իր ձերբակալման արձանագրությունում նշված է, որ ինքը չի ենթարկվել ոստիկանի օրինական պահանջին և ցույց է իրականացրել։ Մինչդեռ, ըստ Պետրոսյանի, ինքը պարզապես միջամտել է, երբ մարդկանց քարշ էին տալիս՝ կրելով նաև ֆիզիկական վնասվածքներ։ 

«Սրճարանից դուրս եկանք, ժողովուրդն արդեն իջնում էր Հրապարակ, մենք որոշեցինք գնալ տուն։ Սրճարանից դուրս եկողին ձերբակալում են, ասում են՝ ոստիկանի օրինական պահանջը չկատարելու համար»,- նշեց Պետրոսյանը։

Աղբյուր` Փաստինֆո