Փաստ ինֆո

Այս տարի լրանում է Հատուկ գնդի կազմավորման 31- ամյակը։ Զորամիավորման անդամներն այսօր Եռաբլուրում էին։ ՀՀ անկախությունից մեկ տարի առաջ է ձևավորվել գունդն ու դարձել անկախության պաշտպանը։ Գնդի կազմում կար 41 վաշտ, որոնք պաշտպանում էին ՀՀ սահմանները։

Գեներալ-լեյտենանտ Գագիկ Մելքոնյանը լրագրողների հետ զրույցում անդրադարձել է ՀՀ տարածքում տեղի ունեցող իրադարձություններին ու փաստել, որ պետք է պատրաստվել պատերազմի։

«Պատերազմը չի ավարտվել։ Քանի թուրքը մեր հարևանն է, մենք պետք է պատրաստվենք պատերազմի։ Պետք է ուժեղանանք, միասնական լինենք, որ կարողանանք պատերազմը հաղթանակենք։ Հայի ոգին անսասան է, բացակայում է միայն համախմբվածությունը։ Արտաքին ուժերը չեն թողնում, որ մենք համախմբվենք, որովհետև բոլորը վախենում են հայի համախմբվածությունից»։

Մելքոնյանը հիշեցրեց՝ նույն թշնամին 90-ականներին փախչում էր զենքը թողած, կռվողն էլ նույն հայն է՝ ուժեղ է։

Իսկ ՀՀ տարածքում՝ Գորիս-Կապան ճանապարհին առաջացած խնդիրը, ըստ Մելքոնյանի՝ իրանական բեռնատարների հետ է կապված, նաև Իրանը պետք է շահագրգռված լինի հարցի կարգավորմամբ։

«Թող ադրբեջանցիերը նստեն իրենք իրենց բուտկայի մեջ։ Ի վերջո, այլընտրանքային ճանապարհ պետք է ունենանք, որը կառուցվում է։ Ասում են երկու հոգի են տարել, վաղը կասեն չորս հոգի։ Եթե այլընտրանք ունենանք, ոչ ոքի չեն տանի, տեխնիկան ու բեռներն էլ կանցնեն նոր ճանապարհով»։

Անդրադառնալով հայ-թուրքական հարաբերությունների կարգավորման, դրական ազդակներին ու երկկողմ հարաբերություններին, Մելքոնյանը նշեց․ «Չկա հավերժական թշնամի, չկա հավերժական բարեկամ։ Կարող են բարեկամներն էլ փոխվել, թշնամիներն էլ»։

Աղբյուր` Փաստինֆո