Փաստ ինֆո

44-օրյա պատերազմում զոհված զինվորների ծնողները իրենց զավակների նկարներով հավաքվել են Հանրապետության հրապարակում և պահանջում են կառավարությունից՝ չեղյալ հայտարարել սեպտեմբերի 21-ի համերգը:

Զինծառայողների բողոքի ակցիայից մեկ ժամ անց կառավարությունից նրանց մոտեցավ վարչապետ Նիկոլ Փաշինյանի օգնական Նաիրի Սարգսյանը։
Հերոսների հարազատները դժգոհություն են հայտնում որոշման դեմ։

«Ինչի՞ եք անում սենց բան։ Մենք կտրականապես դեմ ենք»,- ասում էին հարազատները։
«Երեխեքի տարին չենք տվել, հետաձգեք էդ ամենը կամ լուռ մոմավառություն անենք, գնանք հարգանքի տուրք մատուցենք։ Ուրիշ բան նախատեսեք»,- պնդեցին հարազատները։

Հերոսների ծնողները պահանջում էին, որ Սարգսյանը հերքի, թե թուրքական բեռնատարներ են հրապարակ բերվել։ Վերջինս նշեց, որ տարբեր երկրներից բերված սարքավորումներ են, որոնք ՀՀ-ում չկան։ Բեռնատարը գերմանիայից է եկել, արտադրված է եղել Թուրքիայում։ Նշեց, որ վերջին օրերին տեղեկատվական պայքարի հետ գործ ունեն և որոշակի ուժերից ուղղորդումներ են նկատվում։

Ի վերջո, կառավարությունից առաջարկեցին 10 ծնողի հանդիպել ներսում, սակայն ծնողներից մեկը հայտարարեց, որ արգելում են մուտք գործել կառավարության շենք։

«Մեր եղբայրները զոհվել են, որ մեր երկիրը անկախ լինի»,- ասաց Սարգսյանը, նրան հակադարձեց հարազատներից մեկը․- «Մեր եղբայրները գերի են հիմա։ Սաղ օրը ծեծում, ձեռք են առնում։ Գերիներին բերելուց խոսացեք»։ Վարչապետի օգնականը նշեց, որ նախորդ տարիներին, երբ նշվել է անկախության տոնը ՀՀ-ն Բաքվում գերիներ ունեցել է։

«Մենք անցած տարի, նախանցած տարի գերի չենք ունեցե՞լ, որ անկախության տոն ենք նշել։ Երբ որ սիմֆոնիկ նվագախումբը նվագում է, չի նշանակում, որ քեֆ ու ուրախություն է։ Հիմա ուղղորդում է եղել ծնողներին՝ ընդդեմ այս միջոցառման։ Շատ ծնողներ՝ չիմանալով ինչ է նախատեսված, բողոքել են դրա դեմ»։

Սարգսյանը նշեց, որ բողոքի ակցիային մասնակցած 16 ծնողերի նախօրեին հանդիպել է, նրանք էլ ծրագրին հավանություն են տվել։ Սարգսյանը նշեց, որ սեպտեմբերի 21-ին 30 տարիների ձեռքբերումները կցուցադրվեն, առավոտյան էլ միջոցառումները սկսվելու է Եռաբլուրից։ Եթե չլիներ 30-ամյակը, գուցե տոնակատարություն չլիներ։

«Չեք ուզում մեր զոհերի սգո մեկամսյակը լրանա։ Ձեր արարողության կարգը ժողովրդին դուր չի գալիս։ Մենք 21-ին ներկա կլինենք, բայց չենք երաշխավորում, թե որևէ ծնող հույզերի ֆոնին ինչ կանի»,- ասաց հարազատներից մեկը։

Զոհված զինծառայողներից մեկի հարազատ Արսեն Ղուկասյանը հարցրեց՝ կարո՞ղ են արդյոք երաշխավորել, որ համերգի ներկա գտնվողների մեջ ընդհարումներ չի լինի, համերգը արյունահեղության չի վերածվի։ Սարգսյանը նշեց, որ ամեն ինչ կարգին կլինի, եթե միտումնավոր չխանգարեն համերգը, հայտարարեց, որ ովքեր չեն ուզում, թող չմասնակցեն համերգին։

«Գումար ունեիք, սառնարան առնեիք։ Երեխես հերոս էր, դուք անարգել էիք, գետնին դրել։ Պատրաստվեիք պատերազմին»,- ասաց հերոսներից մեկի մայրը, իսկ Սարգսյանը պնդեց, թե պատրաստվել էին։

Հանդիպմանը հարազատների պահանջը չբավարարվեց, համերգը չի չեղարկվի։

Աղբյուր` Փաստինֆո