Փաստ ինֆո

Եղեգնաձորում դաժանաբար ծեծի ենթարկված փոխգնդապետ Արա Մխիթարյանի գործով մեղադրյալ Զավեն Գրիգորյանի նկատմամբ քրեական հետապնդումը վարույթն իրականացնող մարմնի որոշմամբ դադարեցվել է։ Գրիգորյանի փաստաբան Լևոն Սահակյանը «Փաստինֆո»-ի հետ զրույցում հայտնեց, որ քրեական հետապնդումը դադարեցվել է՝ արդարացնող հիմքով, այն է՝ բացակայում է հանցակազմը։

Ինչպես արդեն տեղեկացրել ենք՝ Արա Մխիթարյանին դաժանաբար ծեծի ենթարկելու գործից անջատված մասը՝ մեղադրյալ Հարություն Գրիգորյանի վերաբերյալ, այժմ գտնվում է Արարատի և Վայոց Ձորի մարզերի ընդհանուր իրավասության դատարանի դատավոր Հարություն Պետրոսյանի վարույթում՝ ապացույցների հետազոտման փուլում։ Մեղադրյալներից մյուսի՝ Զավեն Գրիգորյանի մասով նախաքննությունը դեռևս շարունակվում էր։

Այսօր հայտնի դարձավ, որ վարույթն իրականացնող մարմինը որոշում է կայացրել՝ Զավեն Գրիգորյանի նկատմամբ քրեական հետապնդումը հանցակազմի բացակայության հիմքով դադարեցնելու մասին։ Փաստաբանը մեզ հետ զրույցում հայտնեց, որ կբարձրացվի Զավեն Գրիգորյանին շուրջ 5 ամիս ապօրինի կալանքի տակ պահելու և շուրջ 2 տարի քրեական հետապնդման ենթարկելու հետևանքով պատճառված վնասի փոխհատուցման հարցը։ Պաշտպանության կողմը նաև օրենքի սահմաններում քայլեր կձեռնարկի, որ սուտ մատնություն կատարած բոլոր անձինք ենթարկվեն պատասխանատվության։

«Փաստինֆո»-ն կապ հաստատեց նաև փոխգնդապետ Արա Մխիթարյանի եղբոր հետ, ով մեզ հետ զրույցում հայտնեց, որ Արա Մխիթարյանի առողջական վիճակում որևէ փոփոխություն չկա։ Ինչ վերաբերում է Գրիգորյանի նկատմամբ քրեական հետապնդումը դադարեցնելուն, Մխիթարյանը հայտնեց, որ նամակն այսօր է ստացել։

Հարցին՝ շարունակում են գտնել, որ Զավեն Գրիգորյանն ունի առնչություն դեպքին, մեր զրուցակիցը հայտնեց, որ սպաներն (Մխիթարյանի զինակից ընկերները, որոնք ներկա են գտնվել դեպքին հեղ.) ասում են, որ Գրիգորյանը եղել է դեպքի վայրում, իսկ թե ինչն է հիմք հանդիսացել, ինչի հիման վրա են դադարեցրել քրեական հետապնդումը՝ չի կարող ասել։

Հիշեցնենք, որ փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում եւ արդեն ավելի քան 10 ամիս է, ինչ գտնվում է կոմայի մեջ։ Մամուլի տեղեկություններով, հարազատների պնդմամբ փոխգնդապետի նկատմամբ կիրառված բռնությանն անմիջական մասնակցություն է ունեցել նաեւ Տրդատ Սարգսյանը, որը հենց այս աղմուկի հետեւանքով հայտարարեց մարզպետի պաշտոնից լիազորությունները վայր դնելու մասին։

Միջադեպին մարզպետի ներկայության հանգամանքը իրենց ցուցմունքներում պնդել են նաեւ 3 վկաները, այդուհանդերձ նախկին մարզպետին մեղադրանք չի առաջադրվել։ Քրեական գործով մեղադրանք էր առաջադրվել երկու անձի, սակայն գործը դատարան է գնացել մեկ մեղադրյալի մասով, նախկին մարզպետի օգնականի դրվագը նախաքննական մարմինը դատարանի չի ուղարկել։ Մեղադրյալներից մյուսի՝ Հարություն Գրիգորյանի մասով, ով Զավեն Գրիգորյանի եղբայրն է, գործն անջատվել է ուղարկվել է դատարան։ Հատկանշական է, որ, թեև քրեական գործն անջատվել է, սակայն Հարություն Գրիգորյանի մեղադրանքում ընդգրկված են նաև Զավեն Գրիգորյանի գործողությունները։ Նշենք, որ դեռևս նախաքննության փուլում Վերաքննիչ քրեական դատարանը՝ նախագահությամբ դատավոր Արմեն Դանիելյանի, Զավեն Գրիգորյանին գրավի դիմաց ազատ արձակելու մասին որոշում էր կայացրել։ Հարություն Գրիգորյանը շարունակում է գտնվել կալանքի տակ։

Հեղինակ՝ Իզաբել Սահակյան

Աղբյուր` Փաստինֆո