Փաստ ինֆո

ՀՀ գլխավոր դատախազության շենքի մոտ բժիշկները բողոքի ակցիա են իրականացնում՝ ի աջակցություն «Իզմիրլյան» ԲԿ նախկին տնօրեն, «Հայաստան» խմբակցության պատգամավոր Արմեն Չարչյանի։

Բժիշկ Սամվել Սահակյանը լրագրողների հետ զրույցում ասաց, որ հավաքվել են՝ հայտնելու իրենց մտահոգությունը՝ ՀՀ քաղաքացու առողջական վիճակի վատթարացման մասին։

Սահակյանի խոսքով՝ Չարչյանն արդեն ուներ ծանր հիվանդություն, որը խորացել է անազատության մեջ գտնվելու պայմաններում, բազմաթիվ բարդություններ են ի հայտ եկել։ Մասնավորապես, Արմեն Չարչյանն ունի ինսուլինակախյալ շաքարային դիաբետ, որը շատ ծանր ախտաբանություն է, բայց կառավարելի։

«Եթե ժամանակին կանխարգելվում են բարդությունները, այս հիվանդության հետ մարդ ապրում է երկար՝ առանց որևէ խնդիր ունենալու։ Պատկերացրեք՝ մարմնի մեջ խլուրդ է, որին, եթե ինչ-որ անկյունում չպահեն, սկսում է կրծել, քայքայել, վանդակից բաց են թողնում, հետո՝ բռնելը չափազանց դժվար է։ Արմեն Չարչյանի հետ հիմա այս իրավիճակն է կատարվում»,- նշեց Սահակյանը՝ հավելելով, որ գրեթե բոլոր օրգան համակարգերն ախտահարված են, ընդ որում, ծանր ախտահարումներ են։ Սահակյանը հայտնեց, որ այսօր իմացել է, որ նույնիսկ աչքն է ախտաբանական գործընթացի մեջ մտել։

Սահակյանը մեջբերեց Կառավարության համապատասխան որոշումը, որով հստակ սահմանվում է այն հիվանդությունների և դրանց բարդությունների կողմնորոշիչ ցանկը, որոնք անհամատեղելի են անձի՝ կալանքի կամ պատիժ կրելու հետ։

«Դեռևս մեկ շաբաթ առաջ այս ցանկի մեկ հոդվածին էր համապատասխանում Արմեն Չարչյանի առողջական վիճակի բարդացումները, այսօր իմացա, որ արդեն չորսի է հասնում »,- նշեց նա։

Աղբյուր` Փաստինֆո