Փաստ ինֆո

ԲԴԽ նախագահ (լիազորությունները կասեցված են) Ռուբեն Վարդազարյանի վերաբերյալ քրեական գործը մակագրվել է Երևանի ընդհանուր իրավասության դատարանի դատավոր Մանվել Շահվերդյանին՝ դատարանի նախագահ Արթուր Մկրտչյանի կողմից։ 

Ի դեպ, դատավոր Մանվել Շահվերդյանը, որին մակագրվել է Վարդազարյանի վերաբերյալ քրեական գործը, համարվում է, այսպես կոչված, իշխանահաճո դատավորներից մեկը և սեպտեմբերի 15-ի դրությամբ՝ իր վարկանիշը 11 միավոր է։ Հատկանշական է, որ նախաքննության ավարտից հետո Ռուբեն Վարդազարյանն, անդրադառնալով գործերի բաշխման էլեկտրոնային համակարգի առգրավվման վերաբերյալ հարցադրմանը, ինչի հետևանքով գործերը մակագրվում են դատարանների կողմից, «Փաստինֆո»-ի հետ զրույցում նշել էր, որ Հայաստանի նորագույն պատմության մեջ նման անհարգալից, ցինիկ մոտեցում դատական իշխանության նկատմամբ երբևիցե չի եղել և որ դա իր մեջ պարունակում է կոռուպցիոն ռիսկեր և դատարանների նկատմամբ ճնշումներ։ Վարդազարյանը նշել էր, որ դատական իշխանությունում դատավորներ կան, որոնք դեռ չեն հանձնվել և շարունակում են արդարադատություն իրականացնել, այլ ոչ թե՝ նոտարի գործառույթ իրականացնել, քաղաքականությամբ ենթադրված դատական ակտեր կնիքել, ինչը նշանակում է, որ կան գործեր, որոնք չպետք է ընկնեն այդ անկախ դատավորների մոտ։

Հիշեցնենք, որ ՀՀ ԲԴԽ նախագահ Ռուբեն Վարդազարյանին ՀՔԾ-ում մեղադրանք է առաջադրվել՝ ՀՀ քրեական օրենսգրքի 332-րդ հոդվածի 3-րդ մասի՝ պաշտոնեական դիրքն օգտագործելով արդարադատության իրականացմանը խոչընդոտելու հատկանիշներով, նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։ Վարդազարյանի դեմ քրեական գործ է հարուցվել՝ առանց նրա անձեռնմխելիության հաղթահարման՝ նախկին դատավոր, ԱԱԾ տնօրենի նորանշանակ տեղակալ Անդրանիկ Սիմոնյանի հաղորդման հիման վրա։

Նրա դեմ հետապնդումներն սկսվել են 2020 թվականի նոյեմբերի 15-ի հայտարարությունից հետո, երբ դատավորներին կոչ արեց հավատարիմ մնալ ժողովրդի առջև տված երդմանը և զերծ մնալ բոլոր տեսակի քաղաքական ճնշումներից և ազդեցություններից։

Հեղինակ՝ Իզաբել Սահակյան

Աղբյուր` Փաստինֆո