Փաստ ինֆո

Վերաքննիչ քրեական դատարանում՝ դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի, ընթանում է ՀՀ երկրորդ նախագահ Ռոբերտ Քոչարյանի և մյուսների գործով ՀՀ քրեական օրենսգրքի 300,1-րդ հոդվածով գործի վարույթը կարճելու և քրեական հետապնդումը դադարեցնելու մասին որոշման դեմ բողոքների քննությունը։

Նախորդ դատական նիստին մեղադրող դատախազ Գևորգ Բաղդասարյանը ներկայացրել է վերաքննիչ բողոքը՝ պահանջելով բեկանել Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը և գործն ուղարկել առաջին ատյանի դատարան՝ նոր քննության։ Նույն դատական նիստին պաշտպան Հովհաննես Խուդոյանը ներկայացրել էր նաեւ իր վերաքննիչ բողոքը՝ պահանջելով վերացնել Ռոբերտ Քոչարյանի նկատմամբ ընտրված խափանման միջոց գրավը կամ նվազեցնել գրավի չափը։

«Փաստինֆո»-ի թղթակցի հաղորդմամբ՝ դատական նիստի մեկնարկին նախագահող դատավորը տեղեկացրեց, որ Սեյրան Օհանյանի փաստաբան Կարեն Մեժլումյանից դիմում է ստացվել, համաձայն որի՝ ազգականի մահվան հիմքով չի կարողացել ներկայանալ դատական նիստին, հետևաբար, խնդրում է դատարանին՝ հետաձգել դատական նիստը՝ մեղադրող կողմի բողոքի վերաբերյալ առարկություններ ներկայացնելու հնարավորություն ունենալու համար։

Այս դատական նիստին վերաքննիչ բողոքը ներկայացրել է տուժողի ներկայացուցիչ Սեդա Սաֆարյանը՝ ըստ էության հրապարակելով մեղադրական եզրակացությունը։ Վերջինս պնդում է, թե գործ ունեն հանցավոր խմբի համագործակցության հետ, առկա է հանցագործության դեպք, հետևաբար, քրեական հետապնդումը չէր կարող դադարեցվել՝ հանցադեպի բացակայության հիմով;

Նախագահող դատավորի դիտարկմանը, որ կողմերը գիտեն, թե ինչ շրջանակներում պետք է քննել վերաքննիչ բողոքը, հետևաբար, մեղադրական եզրակացությունը, որին ծանոթ են կողմերը, հրապարակելու անհրաժեշտություն չկա՝Սաֆարյանը հայտարարեց, թե հրապարակում է մեղադրական եզրակացությունը, որովհետև այդտեղ ձևակերպում ստացած փաստական հանգամանքները խոսում են հանցավոր խումբ ձևավորելու և հանցանքի դեպքի մասին։ Սաֆարյանը նշեց, թե դատախազությունը ցանկանում է վերաորակել ՀՀ 309-րդ հոդվածով, ինչի հետ տուժող կողմը համաձայն չէ, գործի քննությունը պետք է շարունակվեր՝ ՀՀ Քրեական օրենսգրքի 300.1-րդ հոդվածով և չի հասկանում, թե ինչու է դատախազությանը զրկում՝ 300.1-րդ հոդվածով գործը վերադարձնելու համար;

Սաֆարյանը պահանջել է բեկանել առաջին ատյանի դատարանի որոշումը՝ գործն ուղարկել առաջին ատյան՝ 300.1-րդ հոդվածով գործի քննությունը շարունակելու համար։ Ըստ նրա՝ քրեական հետապնդումը չէր կարող դադարեցվել՝ հանցադեպի բացակայության հիմքով; Իսկ ինչ վերաբերում է ՍԴ դիմելու մասին դատախազության կողմից ավելի վաղ ներկայացրած միջնորդությանը, ապա, ըստ Սաֆարյանի, նրանք պետք է դիմեին ոչ թե ՍԴ, այլ՝ ԱԺ, որովհետև ՀՀ Քրեական դատավարության օրենսգրքի 35-րդ հոդվածում նման հիմք չկա և, ըստ Սաֆարյանի, խախտվել է օրինականության սկզբունքը, երբ դատարանը վերցրել ու նման եզրահանգման է եկել։ Տուժող Կետիկյանը ևս վերաքննիչ բողոք էր ներկայացրել՝ նշելով, թե խախտվել են տուժող կողմի իրավունքները և պահանջում է բեկանել առաջին ատյանի դատարանի որոշումը։

Հիշեցնենք, որ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։

ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։

Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։

Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։

Դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։

Վերաքննիչ բողոքները կքննվեն համատեղ՝ Վերաքննիչ քրեական դատարանի դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի։

Հեղինակ՝ Իզաբել Սահակյան

Աղբյուր` Փաստինֆո