Փաստ ինֆո

Չի կարող անձի վիճակը վատթարացնող քրեադատավարական նորմը կիրառվել անձի նկատմամբ այն պրոցեսում, որն արդեն սկսվել է։ Այս մասին ՀՀ երկրորդ նախագահ Ռոբերտ Քոչարյանի և մյուսների նկատմամբ քրեական հետապնդումը ՀՀ ՔՕ 300.1-րդ հոդվածով դադարեցնելու որոշման դեմ բողոքի քննության ընթացքում ասաց պաշտպան Հովհաննես Խուդոյանը։

Խուդոյանի դիտարկմամբ՝ քրեական դատավարության կանոնները հստակ սահմանված են և, անձով կամ ոչ դատավարական շահերով պայմանավորված, դրանք չեն կարող պարբերաբար փոփոխվել։ Բացի այդ, փաստաբանն ընդգծեց, որ չի կարող անձի վիճակը վատթարացնող քրեադատավարական նորմը կիրառվել անձի նկատմամբ այն պրոցեսում, որն արդեն սկսվել է։

«Հետևաբար, որքան էլ դատախազությունը ցանկանա կանոն փոխել, այն չի կարող կիրառվել սույն գործով նախկինում ամբաստանյալի կարգավիճակ ունեցող անձանց նկատմամբ, որովհետև այս պահին այդ անձինք քրեական հետապնդման չեն ենթարկվում»,- նշեց Խուդոյանը։

Նրա խոսքով՝ դատախազության բողոքն առարկայազուրկ է, իսկ օրենքում եղած բացը պետք է լրացվի օրենքի փոփոխությամբ, սակայն՝ նույնիսկ, եթե օրենսդրական փոփոխություններից հետո դատախազությունն իր ուզած լիազորությունն ստանա, միևնույն է, սույն գործով դրանք կիրառելի չեն լինի։

«Հնարավոր չէ քրեադատավարության օրենսդրությունը շրջել այնպես, որ դատախազության ցանկությունն իրականանա»,- նշեց Խուդոյանը։

Բացի այդ՝ փաստաբանը նշեց, որ ՀՀ ՔՕ 300.1-րդ հոդվածի հակասահմանադրականության հարցը բարձրացվել է դեռևս նախաքննության ընթացքում և դատախազությունը շատ լավ գիտեր, որ այդ հոդվածն ունի որոշակիության խնդիր։

Անդրադառնալով տուժողի իրավահաջորդ Սեդա Սաֆարյանի կողմից ներկայացված բողոքին, որով վերջինս մասամբ հրապարակել էր մեղադրական եզրակացությունը, հիշատակել «Մարտի 1»-ի իրադարձությունների վերաբերյալ ստեղծված փաստահավաք խմբի գործունեությանը՝ Խուդոյանը հիշեցրեց, որ փաստահավաք խումբն այն «արժանահավատ» անձանցով է համալրված եղել, որոնք խեղաթյուրել են 2008թ մարտի 1-ի իրադարձությունների ժամանակ առաջին մահացած անձի՝ Համլետ Թադևոսյանի մահվան հանգամանքները՝ նշելով, թե Համլետ Թադևոսյանը մահացել է իր մոտ գտնվող հատուկ միջոց նռնակից, մինչդեռ, քրեական գործով բոլորովին այլ հանգամանքներ են ի հայտ եկել։

Դատախազության կողմի ներկայացրած բողոքների վերաբերյալ առարկություններ ներկայացնելիս՝ պաշտպան Հայկ Ալումյանն ընդգծեց, որ առաջին ատյանի դատարանի որոշման բեկանումը հակաիրավական վիճակ կստեղծի։ Նրա խոսքով՝ եթե Վերաքննիչ դատարանը բավարարի դատախազների և տուժող կողմի բողոքները, ստեղծվելու է իրավիճակ, որ իրենց պաշտպանյալները կրկին կմեղադրվեն մի հոդվածով, որը ՀՀ քրեական օրենսգրքում գոյություն չունի։ Ալումյանի խոսքով՝ դատարանի որոշմամբ չպետք է ստեղծվի հակաիրավական վիճակ։

«Արդյո՞ք բողոք բերողները կանխատեսել են՝ ինչ իրավական վիճակ է ստեղծվելու, եթե առաջին ատյանի դատարանի որոշումը բեկանվի։ Այդ դեպքում մեր պաշտպանյալները վերստին մեղադրվելու են մի հոդվածով, որը Քրեական օրենսգրքում չկա, որը ՍԴ-ն արդեն հակասահմանադրական է ճանաչել»,- նշեց Ալումյանը։

Հիշեցնենք, որ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։

ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։

Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։

Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։

Դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։

Վերաքննիչ բողոքները կքննվեն համատեղ՝ Վերաքննիչ քրեական դատարանի դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի։

Հեղինակ՝ Իզաբել Սահակյան

Աղբյուր` Փաստինֆո