Փաստ ինֆո

2021 սեպտեմբերի 7-ից 10-ը Լեհաստանի Կիելցե քաղաքում տեղի է ունեցել Արևելյան Եվրոպայի ամենամեծ ռազմական ցուցահանդեսը։ Ամենամյա այդ միջոցառմանը պարբերաբար մասնակցել են Հայաստանի Հանրապետության պաշտոնական պատվիրակությունները (ՀՀ պաշտպանության նախարար Սեյրան Օհանյանը, ՀՀ պաշտպանության նախարարի տեղակալ Դավիթ Փախչանյանը, Լեհաստանում ՀՀ դեսպան Էդգար Ղազարյանը)։ Այս մասին ֆեյսբուքյան իր էջում գրում է ՍԴ աշխատակազմի նախկին ղեկավար Էդգար Ղազարյանը:

«Այդ ցուցահանդեսների ժամանակ ձեռք են բերվել բազմաթիվ պայմանավորվածություններ, որոնք ամրապնդել և զարգացրել են ռազմատեխնիկական համագործակցությունը ոչ միայն Լեհաստանի, այլև ցուցահանդեսին մասնակցող բազմաթիվ այլ երկրների հետ։ Մասնավորապես, ՀՀ պաշտպանության նախարար Սեյրան Օհանյանի այդ ցուցահանդեսին մասնակցությունից հետո Հայաստանում հիմնադրվել էր «Լյուբավա-Արմենիա» հայ-լեհական համատեղ ռազմաարդյունաբերական ընկերությունը, որը ստեղծված է հիմնականում հայկական բանակի համար ժամանակակից պահանջներին համապատասխանող ամենաորակյալ սաղավարտներ, զրահապատ պաշտպանից բաճկոններ, զրահատեխնիկայի քողարկիչ միջոցներ արտադրելու համար։

Այդ ընկերությունը դադարեցրել է իր գործունեությունը Նիկոլ Փաշինյանի իշխանության գալուց հետո՝ զրկելով մեր զինվորներին և ռազմական տեխնիկային պատերազմի ժամանակ որակյալ միջոցներով պաշտպանվելու հնարավորություններից։

2021 թվականի Հայաստանի ոչ մի պաշտոնյան չի մասնակցել Կիելցեի ռազմաարդյունաբերական ցուցահանդեսին։

Քանի որ Հայաստանի ներկա իշխանությունների համար բանակի և ռազմական գործի մասին պատկերացումները սահմանափակվում են ուտելու հարցով (որը ՀՀ պաշտպանության նախարարի վերջին խորհրդակցություններից մեկից պարզվեց, որ նույնպես կազմակերպում է շատ ցածր մակարդակով), առաջարկում եմ ՀՀ պաշտպանական գերատեսչության ներկայացուցիչներին մասնակցել 2021 թվականի նոյեմբերի 3-ից 5-ը Կրակովում կայանալիք «Gastrofood» միջազգային ցուցահանդեսին»,- գրել է Ղազարյանը։

Աղբյուր` Փաստինֆո