Փաստ ինֆո

ԲԴԽ-ն որևէ դատավարական գործառույթով օժտված չէ՝ ո՛չ մինչդատական վարույթում, ո՛չ դատական վարույթում, ոչ էլ բողոքարկման վերադաս ատյաններում։ Դժվարանում եմ պատկերացնել, թե այդ ճնշումները խորհրդի մի անդամն ինչպես է իրականացնում, ինչ լծակներով, ինչ միջոցներով։ Այս մասին ԱԺ-ում հայտարարեց ԲԴԽ նախագահի պաշտոնակատար Գագիկ Ջհանգիրյանը՝ պատասխանելով «Պատիվ ունեմ» խմբակցության պատգամավոր Թագուհի Թովմասյանի հարցին։

Նշենք, որ ԱԺ-ում այս պահին քննարկվում է Վճռաբեկ դատարանի դատավորների ընտրության հարցը։

Պատգամավոր Թագուհի Թովմասյանը Ջհանգիրյանից հետաքրքրվեց շրջանառվող մտահոգիչ լուրերի մասին, համաձայն որի՝ Ջհանգիրյանը դատական իշխանությունը դարձրել է գրպանային իշխանություն ու բացառապես իր հետ ճշտելով են դատավորները սկսել վճիռներ կայացնել։

Ջհանգիրյանը նշեց, թե ինքը չի կարող մասնակցել ԱԺ ոչ աջ հատվածի, ոչ ձախ հատվածի, ոչ էլ՝ կենտրոնում նստած հատվածի քաղաքական քննարկումներին, քանի որ իրավունք չունի, պետք է ձեռնպահ մնա քաղաքական որևէ գնահատականներից։

«Ձեզ կալանավորներից որևէ մեկն ասել է, որ ես ճնշել եմ Վերաքննիչ քրեական դատարանի դատավորին, որ այս կամ այն որոշումը կայացվի։ Ինքս երկրորդ նախագահի ժամանակ, այնուհետև նաև երրորդ նախագահի ժամանակ հանիրավի անցկացրել եմ բանտում, ես արդարացվել եմ 12 տարի անց ու իմ իրավունքների խախտումը ճանաչել է նաև Եվրոպական դատարանը, ու ես չեմ պատկերացնում, թե ինչպես ես կարող եմ ճնշել դատավորներին, որ ապագայում ևս Հայաստանն ունենա հանիրավի դատապարտված մարդիկ»,- նշեց Ջհանգիրյանը՝ դիմելով Թագուհի Թովմասյանին։

Թագուհի Թովմասյանն էլ նշեց, որ, երբ Արմեն Չարչյանի առողջական վիճակով պայմանավորված տեսակցել է նրան, Չարչյանն ահազանգել է, որ Ջհանգիրյանի ցուցումով է իրականացվում նրա նկատմամբ խոշտանգում, հետապնդում, հետևաբար, ահազանգը հնչեցրել է նաև Ջհանգիրյանին՝ խնդրելով, որ եթե նման բան կա, ձեռնպահ մնալ։ Ինչ վերաբերում է ԲԴԽ լիազորությունների վերաբերյալ իրավակարգավորումների մասին Ջհանգիրյանի հայտարարություններին, Թովմասյանը նշեց, որ ինքը խոսում էր Ջհանգիրյանի փաստացի լիազորությունների մասին։

«Շատ հաճախ դատավորները հյուրընկալվում են Ձեր սենյակում և Դուք այդ ճանապարհով եք նրանց իշխում, այսինքն՝ Դուք ցուցումներ եք տալիս կոնկրետ մարդկանց՝ Ձեր սենյակ հրավիրելով, երբեմն Դուք եք գնում դատարանների նախագահների մոտ և ակնդետ հետևում եք հատկապես քրեական գործերի քննություններին»,- նշեց Թովմասյանը՝ դիմելով Ջհանգիրյանին։

Անդրադառնալով պատգամավորի դիտարկմանը՝ Ջհանգիրյանը նշեց, որ ծիծաղելի է խնդիրը, որ ԲԴԽ նախագահի պաշտոնակատարին և ԲԴԽ անդամներին այցելում են դատավորներ.

«Իսկ ո՞վ այցելի՝ օպերատիվ աշխատողները, դատախազները, ովքե՞ր այցելեն։ Սա ԲԴԽ է և յուրաքանչյուր դատավոր իրեն հուզող խնդիրների, դատարանի առջև ծառացած խնդիրների մասին զեկուցում է մեզ»։

Աղբյուր` Փաստինֆո