Փաստ ինֆո

Հակառակորդը մեր սուվերեն տարածքում ինչ ուզում, անում է, թուրք-ադրբեջանական տանդեմը շարունակում է ճնշումներ գործադրել Հայաստանի վրա: «Փաստինֆո»-ի հետ զրույցում ասաց ՊՆ նախկին նախարար, «Հայաստան» խմբակցության ղեկավար Սեյրան Օհանյանը՝ անդրադառնալով Որոտանի հատվածում ադրբեջանցիների կողմից անցակետ տեղադրելուն:

ՊՆ նախկին նախարարի գնահատմամբ՝ մեր սահմաններին անվերահսկելի վիճակ է, ինչից էլ օգտվում է հակառակորդը և մեր տարածքում որտեղ ուզում, տեղակայվում է:
Զրուցակցի դիտարկմամբ՝ Ադրբեջանը ապաշրջափակման անվան տակ փորձելու է ճանապարհ բացել Նախիջևանից դեպի Ադրբեջանի հիմնական տարածք,ինչպես նաև փորձելու է Սյունիքով միջանցք բացել իր և Թուրքիայի համար:

Հարցին՝ ինչո՞ւ Հայաստանի իշխանությունները որևէ քայլ չեն ձեռնարկում հակառակորդի սադրանքները կանխելու ուղղությամբ, Սեյրան Օհանյանն, ասաց՝ կա՛մ Հայաստանի և Ադրբեջանի ղեկավարությունների միջև ներքին պայմանավորվածություն կա, կա՛մ էլ պարզապես իշխանություններն ի վիճակի չեն կանխել հակառակորդի սադրանքները.

«Եթե կա ներքին պայմանավորվածություն ստվերային գործընթաց սահմանների վերաբերյալ, դա դեմ է խորհրդարանում գործող բոլոր ընթացակարգերին, խորհրդարանը պետք է վերահսկողություն իրականացնի այդ ամենի նկատմամբ, իսկ եթե իշխանություններն ի վիճակի չեն մեր երկրի տարածքից հանել ադրբեջանցիներին և մեր սահմանները կարգի բերել, դա նշանակում է, որ իշխանությունները պետք է հեռանան»,-ասաց Օհանյանը:

ՀՀ ԱԱԾ-ն Որոտանում ստեղծված իրավիճակի վերաբերյալ հաղորդագրության մեջ Որոտանին փոխարեն օգտագործել էր դրա ադրբեջանական անվանումը:

Հարցին՝ ա՞րդյոք այս քայլերով հայկական կողմը չի՞ լեգիտիմացնում հակառակորդի քայլերը՝ Սեյրան Օհանյանը նկատեց, որ ոչ միայն ԱԱԾ-ն է ադրբեջանական տեղանուններ օգտագործում , այլ՝ իշխանության ներկայացուցիչները ևս, որով, հիմք են ստեղծում հետագայում այդ տարածքները հակառակորդին հանձնելու համար:

Կառավարության որոշմամբ՝ Հայաստանի անկախության օրը հրապարակում կնշվի «գունագեղ և մասշտաբային» միջոցառումով՝ նվիրված զոհերի հիշատակին:

Սեյրան Օհանյանն անընդունելի համարեց այս որոշումը. «Պատերազմից դեռևս մեկ տարի էլ չի անցել, վերքերը չեն սպիացել: Ոչ ոք չի ասում, որ անկախության 30- ամյակը չպետք է նշվի, պետք է ստեղծվեր միջգերատեսչական հանձնաժողով,կարծում եմ, որ այդ հանձնաժողովում կգտնվեին մարդիկ, որոնք կհուշեին վարչապետին , որ այսպիսի իրավիճակում նման միջոցառումներն իրականացվում են համեստության և զսպվածության իրավիճակում»,-ասաց Օհանյանը:

Դիտարկմանը՝ որ թեև իշխանությունները Հայաստանի անկախության օրը «գունագետ տոնակատարությամբ» են որոշել նշել, բայց Արցախի անկախության օրվա առթիվ նրանցիցի որևէ մեկն Արցախ չմեկնեց, Սեյրան Օհանյանն ասաց.

«Իրենք վախենում են մեկնել Արցախ, կամ էլ Ադրբեջանի ղեկավարությունը նրանց արգելել է Արցախ գնալ: Իշխանությունն Արցախի հետ կապված բոլոր խնդիրները մերժում է : Բավականին մեծ անորոշություն է ստեղծվել Արցախի շուրջ , որի լուծման համար լուրջ միջոցառումներ պետք է իրականացվեն, իսկ այսօրվա իշխանությունները այդ գործընթացը չեն կատարում, ինչ մեզ համար անընդունելի է»,-ասաց Սեյրան Օհանյանը:

Մանրամասները՝ տեսանյութում

Աղբյուր` Փաստինֆո