Փաստ ինֆո

Անիշխանություն Հայաստանում, հետպատերազմական Հայաստանի և Արցախի հանրապետություններում բազմաթիվ հարցեր կան չլուծված։ Դրանք բոլորը կարևոր են, շատ կարևոր ու հրատապ, բայց այդ բոլոր հարցերը լուծելու համար մենք առաջին հերթին պիտի ազգային ուժեղ պետություն ունենանք, լրջմիտ և կամային պետական այրեր։ Այսօր մենք ո՛չ առաջինն ունենք, ո՛չ երկրորդը։

Բայց վատից ավելի վատթարը կա, քանի որ ընդհանրապես պետություն ունենալ-չունենալու դիլեմայի առջև ենք կանգնած, քանզի անլուրջ և տկարամիտ իշխանությունը ունակ չէ Հայաստանի շահն առաջ տանելու, ավելին, վերջինս հատկապես կապիտուլյացիոն պարտությունից հետո իր իշխանությունը պահելու համար պատրաստ է ցանկացած զիջման գնալ թուրքադրբեջանական եղբայրությանը։

Այն արդեն իսկ մեր թիկունքում քայլ առ քայլ իրականացրել է՝ մեն-մենակ, ծածուկ ու գաղտագողի հանդիպումների, բանավոր ու գրավոր պայմանավորվածություններով, փակ օրակարգերով էլ գուցե կնքել ու ստորագրել է այնպիսի խայտառակ փաստաթղթերի տակ, որոնք երևակայելն անգամ դժվար է։ Սակայն այն, որ արդեն իսկ կատարված փաստերի առաջ հայությանը կանգնեցնելու է այս ապիկար իշխանությունը, կասկած չկա․․․

Իշխանության՝ հանրային մակարդակ բերած օրակարգերը այդ են փաստում և վկայում։ Այս էլ որերորդ անգամ, երբ պետության և ազգի համար համար կարևոր հարցի կամ խնդրի լուծման շեմին ենք լինում, մեկ էլ իշխանությունն իր մանիպուլյացիոն թեմաների պահեստը բաց է անում։

Այսինքն, լուծման կարոտ խնդիրները, որոնք ժամանակավորապես սառեցրել էր, մեկ էլ կրկին հրապարակ է նետում։ Իսկ դրանք մեր ժամանակներում բազմաթիվ են։ Ընդ որում, այդ թեմաներից յուրաքանչյուրն ունեն իրենց շահառուները, իրենց հանրային տիրույթը։

Սակայն միայն հատվածական, առանձին սեգմենտների վրա չէ, որ աշխատում է նիկոլական պոպուլիստական իշխանությունը, քանզի կա խավ, որի համար միևնույն է երկրին պատուհասած աղետն ու դրա չափը։ Վերջինիս համար մասշտաբային գունագեղությունն անհրաժեշտություն է և հոգը չէ սրանց, թե իրենց կողքին ապրում են մարդիկ, որոնց ամեն օրը տառապանքի միջով է անցնում։ Նրանց խրախճանք է պետք և վերջ։

Պատահական չէ, որ հենց այս փուլում Հայաստանում շինծու մեղադրանքներով ձերբակալվում է ՀՀ նախկին գլխավոր դատախազ Աղվան Հովսեփյանը։ Հենց այս օրերին կրկին օրակարգային է դարռնում հայտնի բժիշկ, «Հայաստան» դաշինքի պատգամավոր Արմեն Չարչյանի առողջության վատթարացումը։ Ի վերջո, այդ մասին տևական ժամանակ է արդեն բարձրաձայնվում է, սակայն հանրային տեսակետների ուղղորդման համար մանիպուլյացիոն կոճակը հիմա է սեղմվում նորից։

Պատահակա՞ն է արդյոք, որ հենց այս փուլում է կրկին հրապարակում թեժանում Տիգրանաշենի հանձնման թեման, գերիների հարցերը ցավագին կերպով բարձրացվում և կամ՝ առիթն օգտագործելով շահագրգիռ կողմը դատական հայցի առկայությունը հաշվի չառնելով ֆիզիկայի ինստիտուտի տարածքի ծառերի հանդեպ իսկական սպանդ է իրականացնում․․․

Ի վերջո, հենց այսպիսի ճակատագրական ժամերին իշխանության վերին մակարդակներում լայն զանգվածների համար «հաց և խրախճանք»-ի հին ու հայտնի տրամաբանությամբ զանգվածային և գունագեղ միջոցառումներ է իշխանությունը նախաձեռնում։ Ինչպիսին նախօրեին վարչապետի առաջարկած՝ ՀՀ անկախության երեսնամյա տարեդարձի նշումն է՝ «գունագեղ և մասշտաբային», ընդ որում, «ի հիշատակ» զոհված հերոս տղերքի։ Վստահ են,, բնականաբար, որ կլինի մեծ դիսկուրս, կլինեն ընդդիմացողներ, այսինք կշիկանա մթնոլորտը իշխանության մտացածին օրակարգում, հիմնական թեմայից համատարած ապակենտրոնացում կլինի և վերջինս ձեռքերն ազատ՝ կանի իր սև գործը․․․

Որի մասին բոլորս հետո կիմանանք․․․Երբ արդեն ուշ կլինի․

Աղբյուր` Փաստինֆո