Փաստ ինֆո

Թուրքիայի ղեկավարի հռետորաբանությունը մեզ վստահություն չի ներշնչում։ Եթե նրանք իսկապես տրամադրվել են Հայաստանի հետ հարաբերությունները կարգավորել, պետք է իրական քայլեր ձեռնարկեն։ «Փաստինֆո»-ի հետ զրույցի ժամանակ այս մասին ասաց թուրքագետ Ռուբեն Սաֆրաստյանը։

Անդրադառնալով ՀՀ վարչապետ Նիկոլ Փաշինյանի հայտարարություններին, թե Թուրքիայից դրական ազդակներ կան, թուրքագետը նկատեց Թուրքիայի ղեկավարները պարբերաբար հանդես են գալիս նմանատիպ հայտարարություններով, սակայն դրանք ամենևին չեն համապատասխանում Թուրքիայի իրական քաղաքականությանը։

«Պետք է իսկապես ցույց տան, որ շահագրգռված են Հայաստանի հետ հարաբերությունները կարգավորել առանց նախապայմանների։ Հայաստանն իր գոյության առաջին օրվանից հայտարարում է, որ Թուրքիայի հետ պատրաստ է հարաբերությունները կարգավորել առանց նախապայմանների, իսկ Թուրքիան նախապայմաններ է դնում։ Հիմա էլ չի ասում, որ հրաժարվում է այդ նախապայմաններից, դա է ամբողջ խնդիրը»,-նշեց Ռուբեն Սաֆրաստյանը։

Թուրքագետը համոզված է, որ Թուրքիայի իրական քաղաքականությունը չի փոխվել։ Թուրքիան շարունակում է Հայաստանի նկատմամբ սպառնալիքներ կիրառել, ինչպես նաև աջակցել Ադրբեջանին իր ագրեսիվ քաղաքականության մեջ։
Ռուբեն Սաֆրաստյանը չի կարծում, որ Էրդողանի մի քանի հայտարարությսն հիման վրա կարելի է եզրակացնել, թե Թուրքիան իր քաղաքականությունը Հայաստանի նկատմամբ փոխում է։

«Համոզված եմ, որ Թուրքիան հիմնականում զբաղված է իր պանթուրքիստական ծրագրերն իրականացնելով։ Դրա վկայությունն այն է, որ նոյեմբերին պետք է հայտարարվի թուրքական պետությունների խորհուրդը վերակազմավորվում է և դառնում թուրքական միություն։ Այսինքն` Թուրքիան ձգտում է Ադրբեջանի հետ դաշնային պետություն ստեղծել, ինչպես Ռուսաստանն ու Բելառուսը և արդեն համատեղ զինված բանակի ստորաբաժանումներ են ստեղծում, չորս գեներալ են գործուղել ադրբեջանական բանակ»,-նշեց թուրքագետը։

Վերջինս նկատեց` Թուրքիան ձգտում էր, որ իր զինված ուժերը խաղաղապահ ուժերի մաս կազմեն, սակայն էանի որ Ռուսաստանը դրան դեմ գնաց, Թուրքիան Ադրբեջանի հետ է համատեղ ստորաբաժանում կազմում։

«Այսինքն դա անում են հենց ռուսների քթի տակ։ Սա շատ ուժեղ հակառուսական լիցք է պարունակում, ոչ միայն սադրանք է Ռուսաստանի նկատմամբ, այլև ուժի ցուցադրում»,-նշեց Ռուբեն Սաֆրաստյանը հավելելով, որ Թուրքիայի խաղը շատ մեծ է մեր տարածաշրջանում։

Թուրքագետի խոսքով` Թուրքիան շատ ակտիվ իրականացնում է իր հիմնական նպատակը Ռուսաստանին դուրս մղել տարածաշրջանից և դառնալ տարածաշրջանի միակ գերիշխող ուժ, իսկ Հայաստանը պարզապես խանգարում է Թուրքիայի ծրագրերին։

Անդրադառնալով ապաշրջափակման հարցին` Ռուբեն Սաֆրաստյանը նկատեց դրա մասին դեռ վաղ է խոսել, քանի որ դա հեռու է իրականություն դառնալուց։

«Թուրքիայի գերագույն նպատակն է հնարավորինս թուլացնել Հայաստանը։ Դեպի ծով ելք չունենալով Հայաստանը ստիպված պետք է զիջումների գնա, դրա համար էլ սահմանները փակ է պահում, որ Հայաստանի տնտեսական դրությունն իրենց հաշվարկներով ավելի վատացնի։ Դրա համար նրանք ինչու պետք է սահմանը բացեն, եթե մենք չգնանք զիջումների»,-նշեց Ռուբեն Սաֆրաստյանը` ընդգծելով, որ Թուրքիան ցանկանում է Հարավային Կովկասը դարձնել իր ազդեցության ոլորտ, իսկ Հայաստանն ու Ռուսաստանը խանգարում են այդ հարցում։

Աղբյուր` Փաստինֆո