Փաստ ինֆո

Համայնքների խոշորացման ծրագիրը շարունակվում է և նախատեսվում է 441 համայնքի միավորման արդյունքում ձևավորել 37 համայնք։ Համապատասխան որոշման նախագծին գործադիրը հավանություն տվեց կառավարության այսօրվա նիստում։

ՀՀ տարածքային կառավարման և ենթակառուցվածքների նախարար Գնել Սանոսյանը նշեց, որ խոշորացման գործընթացի ավարտից հետո նախատեսվում է ունենալ 77 համայնք, որոնցից 8-ն ազգային փոքրամասնություններով բնակեցված կլինեն։

Նախարարն ասաց, որ Արագածոտնի մարզում Աշտարակ համայնքի մեջ կներառվի 30 համայնք, Ապարանում՝ 2 համայնք, Թալինում՝ 29, Արարատի մարզի Արտաշատ համայնքում՝ 38 համայնք, Արարատում՝ 12 համայնք, Մասիսում՝ 27 համայնք, Վեդիում՝ 17 համայնք, Արմավիրի մարզի Արմավիր համայնքում՝ 11, Վաղարշապատում՝ 12, Մեծամորում՝ 31, Բաղրամյանում՝ 14, Խոյում՝ 17, Գեղարքունիքի մարզի Գավառ համայնքում՝ 12, Մարտունիում՝ 17, Սևանում՝ 11, Վարդենիսում՝ 15։ Լոռու մարզի Վանաձոր համայնքում՝ 4, Թումանյանում՝ 3, Սպիտակում՝ 21, Փամբակում՝ 15, Կոտայքի մարզի Հրազդան համայնքում՝ 5, Աբովյանում՝ 11, Ծաղկաձորում՝ 2, Գառնիում՝ 6։

«Արագածոտնի մարզում միավորվող Արևուտ և Մեծաձոր համայնքներն ազգային փոքրամասնություններով բնակեցված համայնքներ են, որոնք միմյանց հետ են միավորվում»,-ասաց նախարարը։

ՀՀ վարչապետ Նիկոլ Փաշինյանն ասաց, որ այս նախագիծը կարևոր է նաև քաղաքական բարեփոխումների բովանդակության մեջ, որովհետև բոլոր խոշորացված համայնքներում տեղի են ունենալու համամասնական ընտրակարգով ընտրություններ, որտեղ քաղաքապետի ընտրությունը զուգորդվում է ավագանու ընտրությունների հետ և ընտրությունները տեղի են ունենում կուսակցական ցուցակներով։

«Համայնքների խոշորացումը նոր չէ մեկնարկել։ Պետք է արձանագրենք, որ 2018թ.-ից շատ կարևոր ուղեգիծ ենք որդեգրել՝ սուբվենցիոն համակարգերը դնելով տարածքային համաչափ զարգացման տրամաբանության հիմքում։ Քաղաքական որոշումը կայացված է, և մենք պետք է գնանք այս ճանապարհով։ Վերջին տարիների մեր փորձը ցույց է տալիս, որ խոշորացված համայնքներն առավել արդյունավետ են։

Այս հարցը պետք է լուծվի բացառապես ԱԺ-կառավարություն տիրույթում, այսինքն քաղաքական մեծամասնությունը որոշումը կայացրել է»,-ասաց Նիկոլ Փաշինյանը։

Աղբյուր` Փաստինֆո