Փաստ ինֆո

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանին կալանավորելու մասին որոշման դեմ բողոք կներկայացվի։ Այս մասին «Փաստինֆո»-ի հետ զրույցում ասաց փաստաբան Գագիկ Խաչիկյանը՝ չբացառելով, որ անհրաժեշտության դեպքում ներպետական ատյանները սպառելուց հետո կդիմեն ՄԻԵԴ։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, բավարարել էր Աղվան Հովսեփյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Ընդ որում՝ նրան գործը մակագրվել էր ձեռքով՝ դատարանի նախագահի կողմից։

Փաստաբան Գագիկ Խաչիկյանը տեղեկացրեց, որ դատական ակտը քիչ առաջ է ստացել, այս պահին այն ուսումնասիրում են ու ամենասեղմ ժամկետում կներկայացնեն բողոքը։ Նրա գնահատմամբ՝ դատարանի որոշումն անհիմն է, իսկ Աղվան Հովսեփյանի կալանավորումն ինքնին ապօրինի։

Նշենք, որ քրեական գործը քննվում է շուրջ 1.5 տարի, սակայն այս ընթացքում Աղվան Հովսեփյանի մասնակցությամբ որևէ քննչական գործողություն չի իրականացվել և, վարույթն իրականացնող մարմինը, առանց Աղվան Հովսեփյանի դիրքորոշումը քրեական գործի վերաբերյալ լսելու, անմիջապես նրան մեղադրանք է առաջադրել։

Պաշտպանի փոխանցմամբ՝ քրեական գործի վերաբերյալ դիրքորոշում Աղվան Հովսեփյանը հայտնել է դատական նիստի ընթացքում, սակայն նախաքննական գաղտնիքից ելնելով՝ այլ մանրամասներ այս պահին փաստաբանը չներկայացրեց։

Հիշեցնենք, որ Աղվան Հովսեփյանը ձերբակալվել է սեպտեմբերի 7-ի առավոտյան:

Մոտ 45 տարի իրավապահ կառույցներում ամենաբարձր ղեկավար պաշտոններ զբաղեցրած Աղվան Հովսեփյանին նախաքննական մարմինը չի կարողացել իր ծառայական գործունեության հետ կապված որևէ ապօրինություն մեղսագրել։ Նրան մեղադրանք է առաջադրվել ապօրինի ձեռնարկատիրական գործունեություն ծավալելու, ենթադրյալ փողերի լվացման համար։

Չնայած գործը հարուցվել էր շուրջ 1,5 տարի առաջ, սակայն այդ ընթացքում նախաքննական մարմինը չի կարողացել որեւէ ապացույց գտնել՝ մեղադրանք առաջադրելու համար։ Գործը նոր ընթացք է ստացել ՀՀ ԱԺ արտահերթ ընտրություններից հետո, երբ ի հայտ են եկել կասկածելի անցյալ ունեցող երկու անձ ու տվել իշխանությունների համար ցանկալի ցուցմունք, որն էլ դրվել է Ա. Հովսեփյանի մեղադրանքի հիմքում։ Փաստաբանի փոխանցմամբ՝ առաջադրված մեղադրանքները որեւէ աղերս չունեն իրականության ու իրավաբանության հետ եւ Աղվան Հովսեփյանը չի ընդունել առաջադրված մեղադրանքները։

Հեղինակ՝ Իզաբել Սահակյան

Աղբյուր` Փաստինֆո