Փաստ ինֆո

Երևանի քաղաքապետ Հայկ Մարությանի որոշմամբ «Էրեբունի-Երևան»-ի տոնակատարության համար նախատեսված միջոցները կուղղվեն «100 տուն՝ Արցախում» ծրագրի աջակցմանը։

«Փաստինֆո»-ի հետ զրույցի ժամանակ Երևանի ավագանու «Լույս» խմբակցության ղեկավար Դավիթ Խաժակյանը մտահոգություն հայտնեց, որ միջոցներն ուղղվելու են ոչ թե Ստեփանակերտի քաղաքապետարանին, այլ մասնավոր հիմնադրամին։

«Երևանի քաղաքապետարանը սերտ համագործակցություն ունի Ստեփանակերտի քաղաքապետարանի հետ և եթե համայնքային միջոցներից է գումար հատկացվում Արցախի այս կամ այն կարիքների համար, ապա դա պետք է տեղի ունենա համայնք-համայնք համագործակցության ճանապարհով։ Որքան տեղյակ եմ՝ «100 տուն՝ Արցախում» ծրագիրն իրականացվում է մասնավոր հիմնադրամի կողմից, որը որոշակիորեն քաղաքականացված է»,-նշեց ավագանու անդամը՝ հավելելով, որ սա լավ նախադեպ չէ։

Դավիթ Խաժակյանը նշեց, որ կան դեպքեր, երբ բյուջեի վերաբաշխման հարցը մտնում է ավագանու նիստի օրակարգ, սակայն նաև լինում են դեպքեր, երբ դա քաղաքապետի ցուցումով է իրականացվում։

«Բոլորիս հայտնի է, որ Ստեփանակերտում այսօր ջրի խնդիր կա, և համայնքային իշխանությունը փորձում է այդ խնդիրը լուծել։ Եթե Երևանը Ստեփանակերտին օգնելու ցանկություն է հայտնում, դա ողջունելի է, սակայն ճիշտ միջոցը դա Ստեփանակերտի համայնքին գումարի փոխանցումն է, այլ ոչ թե մասնավորի՝ անկախ նրանից այդ մասնավորը վստահելի է, թե ոչ»,-նշեց Դավիթ Խաժակյանը։

Վերջինս նկատեց՝ բազմաթիվ դեպքեր են եղել, երբ Երևանն, օրինակ, ցանկացել է պուրակի միջոցներ նվիրաբերել Ստեփանակերտի համայնքին, և դա արել է համայնքի հետ համագործակցության միջոցով։

«Փաստինֆո»-ի հետ զրույցի ժամանակ Երևանի քաղաքապետի մամուլի խոսնակ Հակոբ Կարապետյանն ասաց, որ աջակցությունը փոխանցվելու է հիմնադրամին, և դա լինելու է ավագանու միջոցով.

«Քաղաքի ֆինանսները տնօրինվում են ավագանու միջոցով, և ավագանու անդամները կարող են իրենց նկատառումները բարձրաձայնել նիստի ընթացքում։ Ավագանու նիստի ժամանակ կքննարկվի՝ ընդունվելու է այն, թե ոչ, բայց ակնկալվում է, որ կընդունվի»,-նշեց Հակոբ Կարապետյանը։

Վերջինս նաև հավելեց, որ Երևանի քաղաքապետարանն առնվազն 200 մլն դրամի ֆինանսական օժանդակություն է ուղղորդել Ստեփանակերտի քաղաքապետարանին։ Բացի այդ մի շարք այլ ծրագրերով Ստեփանակերտին ուղղակի աջակցությունների է մատուցում։

Աղբյուր` Փաստինֆո