Փաստ ինֆո

Կարմիր Շուկայի բնակիչներն ասում են, որ դիպուկահարի կրակոց է եղել, և կրակել էին հենց անչափահաս երեխայի ննջասենյակի պատուհանի ուղղությամբ։ Բարեբախտաբար երեխան սենյակում չի եղել այդ ժամանակ։ «Փաստինֆո»-ի հետ զրույցի ժամանակ ասաց ԱՀ ԱԺ պատգամավոր Մետաքսե Հակոբյանը։

Հիշեցնենք, որ սեպտեմբերի 6-ին՝ ժամը 19։30-ի սահմաններում Կարմիր Շուկա-Թաղավարդ բնակավայրերի ուղղությամբ տեղակայված դիրքերից ադրբեջանական կողմը կրակել է հայկական դիրքերի և խաղաղ բնակավայրերի ուղղությամբ։

Մետաքսե Հակոբյանը նշեց, որ միգուցե ադրբեջանական կողմն իմանալով է կրակել երեխայի ննջասենյակի պատուհանի ուղղությամբ, քանի որ իրենց նպատակը սադրելն է, որ աշխարհին ցույց տան, թե, իբր, ռուսական կողմն իր պարտավորությունները չի կատարում։ Բացի այդ, թշնամու նպատակն է նաև խուճապ առաջացնել։

«Նման երևույթները մարդկանց համար սովորական են դարձել այնքանով, որ բնակչությունն ուղղակի գիտակցում է, թե որտեղ է ապրում։ Ապրում են ադրբեջանցու հետ քիթ-քթի տակ սահմանին, որտեղից եթե նույնիսկ թիրախավորված չեն կրակում, միևնույն է այդ ձայները լսում ենք։ Երբ բնակիչների հետ խոսում եմ, նրանց մի մասը խուճապի է մատնված, մի մասն անտարբեր է դարձել այս ամեն ինչի նկատմամբ, իսկ մի մասն էլ ուղղակի իներցիայով է ապրում»,-նշեց ԱՀ ԱԺ պատգամավորը։

Մետաքսե Հակոբյանը նկատեց՝ ամենացավալին այն է, որ իշխանությունների կողմից որևէ ռեակցիա այդ ուղղությամբ չկա։ Պատգամավորի խոսքով իշխանությունները պետք է ինչ-որ բան անեն, սակայն ոչինչ չեն անում։

«Ադրբեջանա-թուրքական զորավարժություններ են իրականացվում, իսկ Արցախի իշխանությունների արձագանքը միայն այն էր, որ իրենք աչալուրջ հետևում են, բայց ինչի՞ն են հետևում և ի՞նչ են անելու, բնականաբար՝ ոչինչ։ Արայիկ Հարությունյանը բառիս բուն իմաստով զբաղված է միայն գումար վատնելով և գրպանելով։ Մինչդեռ Արցախում մարդիկ այսօր ուղղակի հացի խնդիր ունեն»,-ասաց պատգամավորը։

Վերջինս ընդգծեց՝ արցախցին այսօր ապրում է ռուս խաղաղապահի ներկայության հույսով և իր միջոցներով անվտանգությունն ապահովելու հույսով։ Անվտանգային խնդիրներն իրենց հերթին առաջացրել են բազմաթիվ սոցիալական խնդիրներ։

Պատգամավորը նկատեց՝ երբ Հայաստանի և Արցախի իշխանությունները թշնամու այս քայլերին կոշտ հայտարարություններով չեն արձագանքում, ցույց են տալիս, որ դա իրենց խնդիրը չէ։

«Որևէ պետական կառույց այսօր զբաղված չէ անվտանգային հարցերով»,-նշեց պատգամավորը։

Աղբյուր` Փաստինֆո