Փաստ ինֆո

Երեկ՝ սեպտեմբերի 6-ին, «Հայաստան» խմբակցության պատգամավորներ Վահե Հակոբյանը, Աննա Գրիգորյանը և Հռիփսիմե Ստամբուլյանն այցելել են «Վարդաշեն» ՔԿ-ում գտնվող պատգամավորներ Արմեն Չարչյանին, Արթուր Սարգսյանին և Մխիթար Զաքարյանին: «Փաստինֆո»-ի հետ զրույցում «Վերածնվող Հայաստան» կուսակցության ղեկավար Վահե Հակոբյանը նշեց, որ բժիշկ Արմեն Չարչյանի առողջական վիճակը մտահոգիչ էր.

«Արմեն Չարչյանն իրեն ծայրահեղ վատ է զգում, նա սուր ինֆարկտ է տարել, սակայն դա անտեսվում է քրեական հետապնդումն իրականացնող մարմնի կողմից, անգամ նրան կալանավայրից բուժհաստատություն չեն տեղափոխում: Սա պարզապես անթույլատրելի է պրոֆեսոր Չարչյանի նկատմամբ, քանի որ նրա շաքարի մակարդակը բարձրանում է, ինքն իրան շատ վատ է զգում, իր վիզուալ տեսքից էլ դա երևում է»,-ասաց Վահե Հակոբյանը:

Ինչ վերաբերվում է կալանքի տակ գտնվող մյուս պատգամավորների՝ Մխիթար Զաքարյանի և Արթուր Սարգսյանի առողջական վիճակին, ապա Վահե Հակոբյանի փոխանցմամբ, պատգամավորներն իրենց լավ են զգում և վստահ են, որ շուտով արդարություն կիրականացվի և նրանք ազատ կարձակվեն:

Զրուցակիցը նաև հայտնեց, որ ընթացքի մեջ է Արմեն Չարչյանի պաշտպանության կոմիտե ստեղծելու գործընթացը, որը զբաղվելու է կալանքի տակ գտնվող պատգամավորի պաշտպանությամբ.

«Մանրամասների վերաբերյալ հայտարարությամբ հանդես կգանք»,-ասաց Հակոբյանը:

Հարցին՝ թե արդյո՞ք այս ձերբակալություններն ընդդիմության աջակիցներին ինչ-որ չափով ետ չեն պահի պայքարելու մտքից՝ քրեական հետապնդումներից խուսափելու համար, Վահե Հակոբյանն ասաց.

«Ես չեմ կարծում, որ մեր դաշինքին աջակցող մարդկանց թվում կան վախեցողներ: Մենք ավելի կուռ ենք դառնալու, իսկ եթե կան վախեցողներ, թող մաղվեն անգամ նրանք, թող մնանք ավելի քիչ, բայց իմանանք, որ միահամուռ բռունցք ենք և մեր թիկունքը ապահով է, մենք չվախեցողների հետ ճանապարհ ունենք գնալու»,-ասաց զրուցակիցը:

Ավելի վաղ հայտնել էինք, Սեպտեմբերի 1-ին՝ Գիտելիքի և դպրության օրվա առթիվ քրեական հեղինակություն համարվող Արտյոմ Կանևսկոյը՝ Արտյոմ Հարությունովը, ԿԳՄՍ նախարարության կողմից պարգևատրվեց որպես «բարերար»՝ Երևանի Միսաք Մեծարենցի անվան թիվ 146 հիմնական դպրոցը վերանորոգելու համար: Նկատենք, որ մինչ քրեական հեղինակությունները պարգևատրվում են, միևնույն ժամանակ ձերբակալվում են համայնքապետեր, բժիշկներ, պատգամավորներ, որոնք քննադատում են գործող իշխանության գործունեությունը:

Վահե Հակոբյանը, մեկնաբանելով այս երևույթն, ասաց.

«Նայեք, մեր երկիրը հիմա ի՞նչ վիճակում է, ո՞ւմ ձեռքում է , այդպիսի պարգևատրումներ էլ տրվում են, իսկ կալանավայրերում էլ գտնվում են մարդիկ, ինչպես պրոֆեսոր Չարչյանը և մեր մյուս գործընկերները՝ Մանվել Փարամազյանը, Մենուա Հովսեփյանը, Առուշ Առուշանյանը, Արթուր Սարգսյանը, Մխիթար Զաքարյանը, Արամ Գասպարյանը, որոնք մեր երկրի կայացման մեջ գնահատելի լումա ունեն»,-ասաց Վահե Հակոբյանը:

Աղբյուր` Փաստինֆո