Փաստ ինֆո

Ադրբեջանն ամբողջ թափով կառուցում է հաղթանակի ճանապարհ կոչվածը, որն անցնում է Հադրութի միջով և հասնում մինչև Շուշի։ «Փաստինֆո»-ի հետ զրույցում ասաց ռազմական փորձագետ Կարեն Հովհաննիսյանը։

Վերջինս չի կարծում, թե ադրբեջանցիները պատերազմից հետո լայնածավալ արագությամբ են շինարարություն իրականացնում գրավյալ տարածքներում։ Ինչ վերաբերում է Վարանդայում օդանավակայանի փորձարկմանը, ապա փորձագետը նկատեց՝ ադրբեջանցիներն ուղղակի ասֆալտապատել են թռիչքուղին, և ըստ նրա՝ թշնամին փորձում է ցույց տալ, որ ինչ-որ գործողություններ է անում։
«Իրականում այդքան էլ հեշտ չէ Ադրբեջանի կողմից գրավված տարածքներում շինարարություն կատարելը կամ ճանապարհներ կառուցելը, որովհետև բազմաթիվ հարցեր կան։ Ըստ միջազգային որոշ փորձագետների՝ Ադրբեջանին հարկավոր է 10 մլրդ եվրո, որ կարողանա այդ տարածքներում որոշակիորեն ենթակառուցվածքներ կառուցի, այնպես որ մոտ ապագայում, դժվար թե, Ադրբեջանը կկարողանա որևէ բան իրականացնել»,-նշեց Կարեն Հովհաննիսյանը։

Հարցին՝ արդյոք այդ հարցում Թուրքիան չի՞ կարող աջակցել նրանց, փորձագետը նշեց, որ խոսքը մեծ գումարների մասին է գնում, և Թուրքիային պարզապես պետք էր, որ այդ տարածքներն անցնեն Ադրբեջանի վերահսկողության տակ։ Կարեն Հովհաննիսյանի խոսքով Թուրքիային մեծապես չի հետաքրքրում՝ այդ տարածքները բնակեցված կլինեն, թե ոչ։

Այնուամենայնիվ, փորձագետը չի ցանկանում թերագնահատել Ադրբեջանին։ Ինչ վերաբերում է պատերազմից հետո Հայաստանի կատարած աշխատանքներին, Կարեն Հովհաննիսյանը նկատեց՝ ՀՀ-ն այս ժամանակահատվածում զբաղված էր բանակով, բանակի արդիականացման, վերազինման գործառույթներով, ինչի ընթացքում աչքաթող են արվել կարևոր ենթակառուցվածքները, այդ թվում ճանապարհները։

«Օրինակ՝ Գորիս-Կապան ճանապարհը փակելու ժամանակ փակուղու առջև կանգնեցինք։ Բացի այդ ջրամատակարարման հետ կապված խնդիր էլ ունենք։ Մեր համակարգերը տարբեր տեղերով էին և Google Map քարտեզով նույնիսկ որոշակի հատվածներով Ադրբեջանի վերահսկողության տակ անցած տարածքներով էին անցնում։ Այսինքն կառուցվածքային համակարգում կարծես թե ոչինչ չենք արել, մատը մատին չենք խփել»,-նշեց փորձագետը։

Սահմանների կահավորման խնդիրը շարունակում է օրակարգում մնալ, ընդ որում եղանակային պայմանների վատթարացման հետ զուգահեռ նաև հերթափոխի հետ կապված խնդիրներ ենք ունենալու.

«Երբ ձյունը հալվեց, սահմանային հերթափոխ սկսեցինք իրականացնել, բայց երբ ձյուն գա, այնտեղ անանցանելի է լինելու։ Այս հարցը շարունակում է ակտուալ մնալ և շատ մեծ ֆինանսական ռեսուրսներ է պահանջում»,-ասաց Կարեն Հովհաննիսյանը։

Հարցին՝ բանակի ուղղությամբ բարեփոխումները ստացվե՞լ են՝ հաշվի առնելով, որ մեր ողջ ուշադրությունն այնտեղ է սևեռվել, փորձագետը նշեց, որ ցանկություն տեսնում է, բայց անհանգստացած է բանակի կադրային քաղաքականությունից, քանի որ այն վտանգավոր է և պետք է շատ զգույշ լինել։

«Այս առումով որոշակի խնդրահարույց հարցեր տեսնում եմ, բայց մնացած առումով թույլ տվեք շատ բան չբարձրաձայնել։ Ամեն դեպքում որոշակի բաներ կատարվում են թե՛ սպառազինության համակարգում, թե՛ սեփական սպառազինություն ստեղծելու հարցով։ Բայց մի տեղ կաղում ենք. դա նոր ռազմավարական դաշնակիցների հարցն է։ Չենք փնտրում և չենք փորձում նոր ռազմավարական դաշնակիցներ գտնել»,-հավելեց փորձագետը։

Հիշեցնենք, որ Բաքվից Արցախի օկուպացված Վարանդա տեղի է ունեցել առաջին փորձնական թռիչքը։ Ադրբեջանական լրատվամիջոցները տեղեկացնում են, որ ինքնաթիռը վայրէջք է կատարել Վարանդայի նորակառույց օդանավակայանում։

Աղբյուր` Փաստինֆո