Փաստ ինֆո

ԲԴԽ-ում մեկնարկել է Վերաքննիչ քաղաքացիական դատարանի դատավոր Գագիկ Խանդանյանին կարգապահական պատասխանատվության ենթարկելու մասին Կոռուպցիայի կանխարգելման հանձնաժողովի ներկայացրած միջնորդության քննությունը։

Ինչպես արդեն տեղեկացրել ենք՝ դատավոր Գագիկ Խանդանյանի նկատմամբ կարգապահական վարույթ է հարուցվել՝ «Հանրային ծառայության մասին» օրենքի 31-րդ հոդվածի 1-ին մասի և «Հայաստանի Հանրապետության Դատական օրենսգիրք» սահմանադրական օրենքի 5-րդ հոդվածի 1-ին մասի պահանջների ենթադրյալ խախտման համար։ ՀՀ դատական օրենսգրքի համաձայն՝ դատավորը չի կարող զբաղեցնել իր կարգավիճակով չպայմանավորված պաշտոն պետական կամ տեղական ինքնակառավարման մարմիններում, որևէ պաշտոն` առևտրային կազմակերպություններում, զբաղվել ձեռնարկատիրական գործունեությամբ, կատարել վճարովի այլ աշխատանք, բացի գիտական, կրթական և ստեղծագործական աշխատանքից: Նշված սահմանափակումները կարգավորվում են նաև «Հանրային ծառայության մասին» օրենքով։

Ըստ ԲԴԽ ներկայացված միջնորդության՝ Գագիկ Խանդանյանը, դատավորի պաշտոնը ստանձնելուց հետո, իրավունք չունենալով զբաղվելու ձեռնարկատիրական գործունեությամբ, հանդիսացել է ՍՊԸ-ներից մեկի սեփականատերը, ապա 2020թ մայիսին կնքված պայմանագրով Խանդանյանին 100 տոկոսով պատկանող բաժնեմասը փոխանցվել է այլ անձի։ Համբարձումյանի դիտարկմամբ՝ բաժնեմասի սեփականատիրոջ փոփոխությունը ենթակա է պետական գրանցման և միայն գրանցման դեպքում է, որ կարելի է համարել, որ սեփականության իրավունքը փոխանցվում է այլ անձի։

Նրա խոսքով՝ Խանդանյանը, մասնակցելով ՍՊԸ կառավարման ժողովին և նշանակելով տնօրեն, կատարել է կառավարչական գործունեություն, ինչը սույն պարագայում դիտարկվում է որպես անհամատեղելիության կարգի խախտում։

Ինչ վերաբերում է ՍՊԸ-ի միջոցով ստացված շահույթին, ապա հանձնաժողովի ներկայացուցիչը նշեց, որ 2020թ շահույթը կազմել է 250,000 ՀՀ դրամ, 2016թ-ին՝ շուրջ 1 մլրդ 121 մլն դրամ, իսկ 2021թ շահույթ չի եղել։ Դատավոր Գագիկ Խանդանյանի ներկայացուցիչ, իրավագիտության դոկտոր, պրոֆեսոր Արթուր Ղամբարյանը խնդրեց որոշակիացնել ու անհատականցնել, թե կոնկրետ ո՞ր գործողությամբ ո՞ր օրենքի ո՞ր դրույթն է խախտվել, սակայն ԲԴԽ-ում միջնորդությունը ներկայացնող ԿԿՀ ներկայացուցիչը պատրաստ չէր կոնկրետացմանը՝ մի դեպքում ասաց, որ դատավորի նկատմամբ վարույթ հարուցելու որոշումն ինքը չի կայացրել, այլ հանձնաժողովը որպես կոլեգիալ մարմին, մեկ այլ դեպքում՝ նշեց, որ կարիք ունի օրենքները կարդալու, իսկ հետո ժամանակ խնդրեց՝ պատասխանները հանձնաժողովի հետ քննարկելու և պատասխանելու համար՝ հաշվի առնելով, որ Կոռուպցիայի կանխարգելման հանձնաժողովը կոլեգիալ մարմին է և ավելի ճիշտ է համարում հանձնաժողովի հետ քննարկելը։ ԲԴԽ նախագահի պաշտոնակատար Գագիկ Ջհանգիրյանն առաջարկեց Արթուր Ղամբարյանին՝ հարցերն ուղղել գրավոր, որ հանձնաժողովի ներկայացուցիները հնարավորություն ունենան պատասխանել, սակայն ԲԴԽ գիտնական-անդամ Գրիգոր Բեքմեզյանն ուղղեց Ջհանգիրյանին՝ նշելով, որ նման իրավունք չկա, օրենքը նման բան չի նախատեսում։

Հեղինակ՝ Իզաբել Սահակյան

Աղբյուր` Փաստինֆո