Փաստ ինֆո

«Գռզո» մականունով հայտնի գործարար, «Քաղաքացիական պայմանագիր» խմբակցության պատգամավոր Խաչատուր Սուքիասյանի դեմ հայցադիմում է ներկայացվել դատարան՝ ՀՀ երրորդ նախագահ Սերժ Սարգսյանի պատիվն ու բարի համբավն արատավորող տեղեկատվությունը հերքելու պահանջով։ Փաստաբան Ամրամ Մակինյանը լրագրողների հետ զրույցում ասաց, որ պահանջում են, որ հերքում ներկայացվի այն նույն ամբիոնից, որից հայտարարել է, այսինքն՝ ԱԺ-ի ամբիոնից։

Նրա խոսքով՝ հայցադիմումը ծավալուն է, ներկայացվել են բոլոր հիմնավորումները, որոնց ուժով համոզված են, որ դատարանը բավարարելու է հայցադիմումը՝ պարտավորեցնելով Սուքիասյանին հերքել տեղեկությունները։

«Այս իշխանությունները մինչև իշխանության գալը գեներացրել են շատ մեծ քանակությամբ սուտ, ինչի արդյունքում կարողացել են հանրությանը բաժանել սևերի և սպիտակների, գեներացրել են ահռելի քանակությամբ ատելություն, որի արդյունքում ունենք այն, ինչ ունենք։ Հրապարակային հայտարարում եմ, որ այսուհետ բոլոր ստերի ետևից գնալու ենք և այս իշխանությունները չեն կարողանալու այլևս օգտվել մեր համբերությունից, մեր բարի կամքից, մեր համբերատարությունից և հասարակության լայն զանգվածների շրջանում սուտ տեղեկություններ, հերյուրանքներ հրապարակելով անվանարկել մարդկանց, որոնց գործունեության, աշխատանքի, ջանքի և դրած կյանքի արդյունքում հիմա կանգնած ենք այստեղ »,- նշեց Մակինյանը՝ հավելելով, որ այլևս նման վարք չեն հանդուրժելու, այլևս չեն հանդուրժելու, որ որևէ սուտ վերցնեն և պտտեն տեղեկատվական տեխնոլոգիաների օգտագործմամբ՝ այն դարձնեն փուչիկ։

Մակինյանը հիշեցրեց, որ արտահերթ խորհրդարանական ընտրությունների նախընտրական շրջանում Սերժ Սարգսյանը 24 ժամ ժամանակ էր տվել Նիկոլ Փաշինյանին՝ հայտարարությունները, որի համար այժմ ներկայացվում է հայցադիմում, հերքելու կամ փաստեր ներկայացնելու համար։ Մակինյանի խոսքով՝ չի կարելի նախընտրական քարոզարշավները անցկացնել ստերով, խաղալ մարդկանց նուրբ լարերի վրա։

«Որևէ մեկը չի մոռացել, թե 2018թ ապրիլին Նիկոլ Փաշինյանն ինչ էր խոսում արագաչափերի սեփականատիրոջ մասին, վերագրվում էր ՀՀ երրորդ նախագահի եղբորը, հիմա այդ մասին որևէ բան չի խոսում, այդ արագաչափերն ավելի ավելացված ռեժիմով մարդկանց տուգանում են։

«Ինչու, մենք տուգանքի մատերիա՞լ ենք», սա իմ հռետորաբանությունը չէ»,-նշեց Մակինյանը՝ ընգդծելով, որ ազդարարում են ստի վերջը, բոլորն իրենց արտահայտած հրապարակային, առավել ևս՝ անվանարկող հայտարարությունների համար պետք է պատասխան տան դատարանում։

Նշենք, որ հայցվոր կողմը պահանջում է նաև 1 մլն դրամի չափով փոխհատուցում, որը կփոխանցվի Զինվորների ապահովագրության հիմնադրամին։

Աղբյուր` Փաստինֆո