Փաստ ինֆո

Վերաքննիչ քրեական դատարանի դատավոր Սերգեյ Մարաբյանին կարգապահական պատասխանատվության ենթարկելու մասին ՀՀ արդարադատության նախարարության կողմից ներկայացված միջնորդության քննությունը հետաձգվեց։ 

«Փաստինֆո»-ի թղթակցի հաղորդմամբ՝ ԲԴԽ նիստի մեկնարկին նախագահի պաշտոնակատար Գագիկ Ջհանգիրյանը հայտնեց, որ դատավոր Մարաբյանի կողմից դիմում է ստացվել, որով դատավորը խնդրել է հետաձգել դատական նիստը և իր բացակայությունը համարել հարգելի՝ նկատի ունենալով, որ իր մոտ առկա են առողջական խնդիրներ և կան կասկածներ՝ կորոնավիրուսային հիվանդություն ունենալու վերաբերյալ։ ԲԴԽ նիստին անձամբ չէր ներկայացել նաև ՀՀ արդարադատության նորանշանակ նախարար Կարեն Անդրեասյանը՝ դիմում ներկայացնելով առ այն, որ միջնորդության քննության ժամը համապատասխանում է իր և օտարերկրյա դիվանագիտական առաքելության ղեկավարի հետ հանդիպման ժամին, ուստի, չի կարող ներկայանալ խորհրդի նիստին։ Ի դեպ, օրեր առաջ՝ Երևանի ընդհանուր իրավասության դատարանի դատավոր Արման Հովհաննիսյանին կարգապահական պատասխանատվության ենթարկելու վերաբերյալ նիստին ԲԴԽ նախագահի պաշտոնակատար Գագիկ Ջհանգիրյանը, անդրադառնալով Կարեն Անդրեասյանի բացակայությանը, հայտարարել էր, որ, հաջորդիվ, եթե Կարեն Անդրեասյանը չներկայանա նիստերին, նիստերը չեն էլ մեկնարկի, սակայն այսօրվա նիստին ևս Անդրեասյանը չէր ներկայացել՝ իր փոխարեն կրկին ուղարկելով տեղակալ Սուրեն Գրիգորյանին։

ԲԴԽ-ն որոշեց հետաձգել այն։ Հաջորդ նիստը նշանակվել է սեպտեմբերի 27-ին, ժամը՝ 15։00-ին։

Հիշեցնենք, որ Վերաքննիչ քրեական դատարանի դատավոր Սերգեյ Մարաբյանի նկատմամբ կարգապահական վարույթ է հարուցվել ՀՀ արդարադատության նախկին նախարար Ռուստամ Բադասյանի կողմից՝ ՀՀ գլխավոր դատախազի հաղորդման հիման վրա՝ ԱԺ նախկին նախագահ Արարատ Միրզոյանին ծեծի ենթարկելու գործով մեղադրյալներից մեկի՝ Ժիրիկ Սիրեկանյանի խափանման միջոցը փոխելու համար։ Մասնավորապես, ինչպես արդեն տեղեկացրել էինք, առաջին ատյանի դատարանը, քննելով Սիրեկանյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը, որոշել է բավարարել այն, ինչը պաշտպանության կողմը վիճարկել է։ Վերաքննիչ քրեական դատարանը՝ դատավոր Սերգեյ Մարաբյանի նախագահությամբ, բավարարել էր փաստաբանի բողոքը՝ բեկանելով Սիրեկանյանին կալանավորելու մասին առաջին ատյանի դատարանի որոշումը՝ հիմքում դնելով մեղադրյալի այլուրեքությունը՝ դեպքի վայրում չգտնվելու հանգամանքը փաստող տվյալները։ Այսինքն՝ վերծանումներ են եղել, որոնք հաստատել են, որ դեպքի ժամին մեղադրյալը գտնվել է այլ տեղանքում։ Վերաքննիչ քրեական դատարանի որոշման դեմ էլ վճռաբեկ բողոք էր ներկայացրել արդեն դատախազությունը, որի արդյունքում այն բեկանվել էր։ Վճռաբեկ դատարանի սույն որոշումից հետո դատավորի նկատմամբ վարույթ է հարուցվել։

Հեղինակ՝ Իզաբել Սահակյան

Աղբյուր` Փաստինֆո