Փաստ ինֆո

Հայաստանը փաստացի Արցախի անվտանգության երաշխավորության բանալիները հանձնեց Մոսկվային: Այս մասին հրավիրված մամուլի ասուլիսին ասաց վերլուծաբան Արգիշտի Կիվիրյանը:

Կիվիրյանի դիտարկմամբ՝ նոյեմբերի 9-10-ի հայտարարությունը ստորագրելուց հետո, երբ Արցախում տեղակայվեցին ռուս խաղաղապահները, փաստացի Մոսկվան է հանդիսանում Արցախի անվտանգության երաշխավորը և Մոսկվայում է որոշվում, թե ով կայցելի կամ չի այցելի Արցախ:

«Նոյեմբերի 9-ի լույս 10-ից հետո այդ հարցը չի որոշվում Երևանում, որոշվում է՝ Մոսկվայում»,-նշեց Կիվիրյանը, ապա անդրադառնալով Փաշինյանի կողմից Արցախ չմեկնելուն՝ Կիվիրյանը նշեց․ «Լավ, ասենք թե Նիկոլ Փաշինյանը գնաց Արցախ եւ դրանով վտանգեց Արցախի անվտանգությունը, դա էր ճի՞շտ, թե՞  չգնալն էր ճիշտ: Ժամանակին ինքը գնաց եւ ասեց` «Արցախը Հայաստան է, եւ վերջ» եւ բոլորս գիտենք չէ՞ դրա հետեւանքները»։

Վերլուծաբանի կարծիքով` մենք այսօր գտնվում ենք շատ բարդ իրավիճակում եւ ցանկացած անպատասխանատու քայլ կարող է հանգեցնել նորանոր կատակլիզմների հայ ժողովրդի համար։ 

«Նիկոլ Փաշինյանի ճակատագրի վրա դա չի անդրադառնա, նա ունի սեփական ինքնաթիռ և կարող է ցանկացած պահի ծլկել: Նիկոլին կարելի է հիստերիկացնել, ստիպել անել ինչ-որ բան, ինչից հետո ամբողջ կուժը կոտրվում է հայ ժողովրդի գլխին»,- նշեց Կիվիրյանը։

Կիվիրյանն ընդգծեց, որ ցանկացած սխալ առաջին հերթին անդրադառնալու է շարքային մարդկանց՝ առաջին հերթին արցախահայության ճակատագրի վրա։

Աղբյուր` Փաստինֆո