Փաստ ինֆո

Անհասկանալի է այն ամենն, ինչ այսօր կատարվում է իրավապահ համակարգում, կարծես թե նպատակ է հետապնդվում՝ Արմեն Չարչյանի առողջությունը, կյանքն ամեն կերպ վտանգելու։ Հասել ենք մի այնպիսի աստիճանի, որ կալանավորումն առհասարակ անհամատեղելի է Արմեն Չարչյանի առողջական վիճակի հետ, բայց այսօր իրեն տեղափոխում են ՔԿՀ, որտեղ փաստացի ինֆարկտային վիճակի էր հասել պրոֆեսոր Չարչյանը։ Այս մասին լրագրողների հետ զրույցում ասաց «Հայաստան» խմբակցության պատգամավոր Արամ Վարդևանյանը։

«Սա ինչ անմարդկային իրավիճակ է։ Մենք գիտենք, որ Հայաստանի նորագույն պատմության մեջ եղել են իրավիճակներ, երբ, ի վերջո, մարդու մահ է արձանագրվել»,- նշեց Վարդևանյանը՝ հավելելով, որ նման իրավիճակներում պետք է լինեն մարդասեր։

Նրա փոխանցմամբ՝ քրեական հետապնդման պայմաններում Արմեն Չարչյանը եղել է ազատության մեջ, ապա կալանավորվել, հետո՝ գրավի դիմաց ազատ արձակվել և ավելի երկար ժամանակ եղել ազատության մեջ։

«Պատգամավորի դեպքում, եթե ցանկանում են կալանավորել, թող գան ԱԺ՝ համաձայնություն ստանալու։ Ինչու՞մ է խնդիրը, մեր հարցերի՞ց են անհանգստանում, որ պետք է տանք գլխավոր դատախազին»,- նշեց Վարդևանյանը՝ հավելելով, որ անմարդկային է նժարին առողջական վիճակը դնելը։

Պատգամավորը նշեց, որ որքանով իրեն հայտնի է՝ բժիշկները Չարչյանի առողջական վիճակը բավարար չեն համարել, բայց ՔԿՀ-ն ունեցել է այնպիսի ինքնավստահություն, որ կարող է այդ առողջական վիճակում ՔԿՀ-ում պատշաճ բուժօգնություն ցուցաբերել, դա եղել է նաև այլ դեպքերում, ՔԿՀ-ներն ունենում են նման վստահություն, բայց կյանքը բոլորովին այլ բան է ցույց տալիս։

Վարդևանյանն ընդգծեց՝ դատախազությունը շատ ծանր բեռ է իր ուսերին վերցրել թե՛ մարդկային, թե՛ իրավական իմաստով։ Նրա խոսքով՝ դատախազությունում էլ շատ մարդիկ կան, որոնք բարոյական արժեքի կրող են, ինչ նպատակ են հետապնդում, երբ տեսնում են, որ մարդու առողջական վիճակն ինչպես է իրենց աչքի առաջ վատանում։

«Եթե իրավունքի գերակայությամբ առաջնորդվեինք, պատկերը լինելու էր հետևյալը՝ Էրիկ Ալեքսանյանը չէր հասցնի միջնորդություն գրել, որովհետև դատախազությունը դա արդեն արած էր լինելու։ Դատախազությունը կողմ չի պահում, դատախազությունն իրավունքին և օրենքին ծառայող կառույց է, ոչ թե՝ կոնկրետ թիրախավորված մարդու առողջական վիճակը քայքայող կառույց»,- նշեց նա։

Վարդևանյանը ուշադրություն հրավիրեց նաև այն հանգամանքի վրա, որ ՀՀ-ում գտնվող դեսպանատները պատշաճ ձևով չեն արձագանքում ՀՀ-ում սելեկտիվ արդարադատությանը, որ ՀՀ-ում երեք պատգամավորներ կալանավորված են։

«Օրինակ՝ ԱԺ դեպքերը բոլորդ հիշում եք, որը, չգիտեմ, թե ինչ նպատակ էր հետապնդում, բայց առնվազն արդյունքը, որին իրենք հասան, դա Քրեական օրենսգրքի հետ ևս մեկ անգամ առնչվելն է, բայց դուք տեսե՞լ եք, որ ինչ-որ մեկը ձերբակալվի։ Համոզված եմ, որ քրեական գործ չեն էլ հարուցելու, բայց այս դեպքում ինչքան հետևողական են՝ րոպե շուտ Չարչյանին ձերբակալեն։ Բա դեսպանատներն ասելիք չունե՞ն»,- նշեց Վարդևանյանը՝ հավելելով, որ գուցե պետք է նախաձեռնել հենց անձամբ նրանց հետ հանդիպել՝ լեզվի պատնեշը հաղթահարելու համար։

Աղբյուր` Փաստինֆո