Փաստ ինֆո

Եթե նայենք խանութների գներին, իսկ հետո Էկոնոմիկայի նախարարի հայտարարությանը, կտեսնենք, որ շատ բաներ իրականությանը չեն համապատասխանում։ «Փաստինֆո»-ի հետ զրույցի ժամանակ ասաց «Ագրարագյուղացիական միավորում» ՀԿ նախագահ Հրաչ Բերբերյանը։

Նշենք, որ այսօր՝ կառավարության նիստի ժամանակ, Էկոնոմիկայի նախարար Վահան Քերոբյանն ասել էր, որ գյուղատնտեսական տարին ընդհանուր առմամբ լավ է ընթանում։ Խոսելով մթերումների մասին՝ նախարարը նշել էր. «Այսօր արդեն թարմ գյուղմթերքի մասով հասել ենք անցած տարվա ցուցանիշին՝ մոտ 145 հազար տոննա է։ Հույս ունենք՝ մինչև տարեվերջ ռեկորդ խփել և անցնել 200 հազար տոննայի սահմանները»,-ասել էր նախարարը։

«Անցած տարվա համեմատ կաղամբի գինն աճել է 5 անգամ, գազարինը՝ 5 անգամ, մսի գինը 1000 դրամով է բարձրացել այն դեպքում, երբ արտարժույթի գինը նույնն է մնացել։ Թե ինչի հիման վրա է նախարարն այդ թվերն ասում, չգիտեմ։ Լավ կլիներ, որ վարչապետին կից գյուղատնտեսության մի հանձնաժողով լիներ, որը կստուգեր այդ թվերը, և այսօր կհերքեր կամ կգովերգեր նախարարին»,-նշեց Հրաչ Բերբերյանը։

Նրա խոսքով շուկայում գյուղմթերքն այսօր սահմանափակ է։ Կարտոֆիլն արտահանվում է, բայց մանրածախ գինը դարձել է 250 դրամ։ Հրաչ Բերբերյանն ասաց, որ իրենք այդ թվերին կանդրադառնան 1-2 ամիս հետո, քանի որ հիմա դեռ վաղ է։

«Խաղողի գնումներն էլ կվերջանան, նոր կխոսենք այդ մասին։

Գյուղացիներից բողոքներ ունենք, որ գործարաններն այդ քանակությամբ խաղող չեն ընդունում այսօրվա դրությամբ։ Այստեղ քաղաքականություն է գնում, որ գյուղացին արժեքն իջեցնի։ Այսինքն՝ օրինակ 135 դրամով 20 տոննայի պայմանագիր ունեն, բայց փաստացի գյուղացին ունի 100 տոննա խաղող։ Բնականաբար ասում են՝ այն 80 տոննան էլ ուրիշ գնով կտաս, հակառակ դեպքում չենք ընդունի։ Գյուղացու անպաշտպանվածությունը դեռ մնում է։ Շատ գյուղացիներ ուղղակի հիասթափված մեկնում են Հայաստանից»,-ասաց Հրաչ Բերբերյանը։

Վերջինս երեկ Սոթքի տարածաշրջանում է եղել, արձանագրել, որ մարդկանց խոտհարքներն այրվում են, անասնակեր չկա, հետևաբար գյուղացիները ստիպված կլինեն մորթել անասուններին։ Ընդհանուր առմամբ՝ Հրաչ Բերբերյանի խոսքով անասնակերը Հայաստանում կրկնակի թանկացել է, որոշ տեղերում անգամ եռակի։

«Գլխաքանակի անկում կունենանք։ Ի՞նչ ռեկորդային թվերի մասին է խոսքը, երբ Շիրակի տարածաշրջանում 40 տոկոս բերքի կորուստ ենք ունեցել։ Դե հիմա նախարարն ասում է, ուրեմն մի բան գիտի, երևի ինչ-որ թվեր կան, որի վրա հենվում է, ինչը մեզ համար այդքան էլ հուսալի թվեր չեն։Մեր թվերն աշնանը կհայտնենք, արդեն ավելի լավ ուսումնասիրված»,-նշեց Հրաչ Բերբերյանը։

Վերջինս նաև հավելեց՝ Գեղարքունիքի մարզում գյուղացիները բողոքում էին այս տարվա ներկրված գարու սերմացուից։ Հրաչ Բերբերյանը հորդորում է գնալ Սոթքի տարածաշրջան և ստուգել՝ արդյոք այդ գարին բերք տվե՞լ է, թե՞ ոչ։

«Մարդիկ կան՝ ասում են, որ ընդհանրապես բերք չունեն։ Վարդենիսում ոռոգման խնդիր այդքան չի եղել, ուղղակի սերմն անորակ է եղել։ Դրա համար ամեն մեկին չեն թողնում՝ մասնագիտական գործով զբաղվի։ Գյուղատնտեսությունն առևտուր չէ, որ մի տեղից գնեն ու մյուսին վաճառեն։ Կան մասնագիտական բաներ, որոնք պետք է վերահսկեն»մ-հավելեց Հրաչ Բերբերյանը։

Աղբյուր` Փաստինֆո