Փաստ ինֆո

Ադրբեջանական զինծառայողների գցած հրդեհների հետևանքները և վնասները դեռ ամբողջությամբ չեն հաշվարկվել։ Օգոստոսի 29-ից պարբերաբար ծխացող խոտերը Կութում միայն նախօրեին է հնարավոր եղել մարել։

Երեկ կեսօրից Կութում կրկին հրդեհ էր բռնկել, որը փորձել են կառավարել տեղի բնակիչները, մինչև մոտ 1,5 ժամ անց օգնության են հասել հրշեջները։ Կրակի դեմ պայքարել են 5 ժամից ավելի։ Տեղեկությունը «Փաստինֆո»-ին հայտնեց Կութ գյուղի բնակիչներից մեկը։

Վարդենիսի հրշեջ-փրկարարական ծառայության ջոկատը Կութ է ժամանել մեկ «Զիլ» մակնիշի մեքենայով, որպեսզի սարերի հրդեհը հանգցնեն, սակայն այդ մեքենայով հնարավոր չի եղել տեղաշարժվել, ուստի Մարտունուց «Կամազ» մեքենա է օգնության եկել։

«Երեկվա դրությամբ հրշեջների՝ մինչև Վարդենիսից գալը, բավականին ժամանակ անցավ։ 5-6 բնակիչ առավոտյան բարձրացել էին սարը՝ խոտ հնձելու։ Կրակը մոտեցել է, փորձել են հանգցնել։ Հրշեջները երկու օր առաջ էլ էին գյուղում ու մենք կազմակերպեցինք գյուղի երիտասարդներով, որ կրկին կրակը կառավարենք, մինչև հրշեջները հասան ու ուշ ժամի հանգցրեցին։»։

Առավոտվա դրությամբ կրակ Կութում չեն նկատել, սակայն այրված խոտը շարունակում է ծխալ։ Բնակիչները հույս ունեն՝ կրակը նորից չի բռնկվի։

«Մարել հնարավոր է եղել, բայց պետք է անձրև գա, որովհետև հնարավոր է հողի տակ օջախ մնա, քամին կարող է նորից կպցնել։ Ներկա դրությամբ՝ վառված տեղերն ուղղակի ծխում են»։

Վնասի չափը չի հաշվարկվել, բայց ըստ Կութի բնակչի՝ 150 հա արոտավայր է այրվել, 60 հա-ից ավելի խոտհարք։

Ադրբեջանական զինծառայողների սադրած հրդեհների հետևանքով օգոստոսի 29-ից մինչ օրս ՀՀ Գեղարքունիքի մարզի Գեղամասար համայնքի Ազատ, Կութ, Նորաբակ և Սոթք գյուղերում այրվել է շուրջ 270 հա արոտավայր և շուրջ 150 հա խոտհարք:

Ոչնչացվում է նաև խոտը, որ մարդիկ չարչարանքով են պաշարել ձմռան համար: Հայտնի է, որ ոչնչացվել է Կութ գյուղի միայն մեկ բնակչի պաշարած մոտ 500 հակ խոտ:

Կութ գյուղի մի շարք բնակիչներ ծանր նյութական վնաս են կրել, այրվել է խոտհարքերը, հնձած խոտը, ինչպես նաև՝ բնակիչներից մեկի խոտհնձիչը։

Աղբյուր` Փաստինֆո