Փաստ ինֆո

Փոքր ներքաղաքական խնդիրներն ավելի մեծ կարևորություն են ձեռք բերել, կա հստակ հրահանգավորում, բայց համազգային, համապետական նշանակության իրական խնդիրները, որոնք պետք է բարձրացնեն հայերի միջազգային իրավական պաշտպանվածությունը և բացառեն անպատժելիությունը՝ մեր դեմ կատարված հանցագործությունների համար մղվել են երկրորդական, երրորդական պլան և ուշադրության տակ չեն գտնվում։ Այս մասին «Փաստինֆո»-ի հետ զրույցում ասաց իրավապաշտպան Սիրանուշ Սահակյանը։

Նշենք, որ Սիրանուշ Սահակյանը մտահոգություն էր հայտնել առ այն, որ ՀՀ-ն խոցելի է՝ ադրբեջանական այն զինծառայողների ինդետիֆիկացման հարցում, որոնք կատարել են լրջագույն պատերազմական հանցագործություններ։

Սիրանուշ Սահակյանը «Փաստինֆո»-ի հետ զրույցում նշեց, որ միջազգային գործընկերները, բացի այն, որ խնդրում են փաստեր կատարված հանցագործությունների վերաբերյալ, նաև հարցադրումներ են ուղղում միջադեպին ներկա ադրբեջանցի զինծառայողների ինքնության առնչությամբ։

«Մենք մեր սեփական միջոցներով կարողացել ենք իրականացնել ինդետիֆիկացիա որոշ անձանց պարագայում, բայց կարծում եմ, դրա հիմնական պատասխանատուն պետությունն է, որովհետև օպերատիվ և քննչական ռեսուրսը անհամեմատ ավելին է, քան՝ մասնավոր անձանց»,- նշեց Սահակյանը՝ հավելելով, որ տեսանյութերում եղած ադրբեջանցի զինծառայողների դեմքերը նկատելի են, նրանք հետագայում այլ տեսանյութերում էլ են երևում և լուրջ աշխատանքներ իրականացնելու դեպքում, կարելի էր հասնել այդ անձանց նույնականացման։

Նրա խոսքով՝ նույնականացված անձանց առնչությամբ Հայաստանը կարող էր միջազային հետախուզման գործընթացներ իրականացնել՝ դրանով ֆիզիկական անվտանգության սպառնալիքներ ստեղծել ադրբեջանցի զինծառայողների համար, ինչը կունենար կանխող նշանակություն։ Բացի այդ՝ նույնականացումը ճիշտ իրականացնելու դեպքում միջազգային գործընկերները կարող էին քաղաքական սանկցիաներ կիրառել անձանց ընտանիքի անդամների հետ, օրինակ՝ օտարերկրյա պետություններում գտնվող միջոցները սառեցվեն, տեղաշարժի իրավունքի վերաբերյալ սահմանափակումներ կիրառվեին, ինչպես նաև՝ նրանց միջազգային տեղաշարժը կարող էր սահմանափակվել և ինչ-ինչր հանգամանքներում նրանք կարող էին որևէ երկրի դատարանի առջև ներկայացվել։

Ս.Սահակյանի դիտարկմամբ` առաջնային քննչական և օպերատիվ գործողությունները պետք է իրականացվեն հենց մեր երկրի իշխանությունների կողմից, սակայն տեսանելի արդյունքներ չկան, ինչը սահմանափակում և դժվաևացնում է ադրբեջանցիների քրեական պատասխանատվությունը։ Նրա խոսքով՝ անհասկանալի է, թե ինչու մենք նման լրջագույն համապետական խպնդրի հարցում պետք է ունենանք նման անպատասխանատվություն կամ անտարբերություն։ Ըստ Սահակյանի՝ իրավապահ մարմինների ողջ ռեսուրսը վատնում են և ժամանակային առումով չեն կարողանում զբաղվել այլ խնդիրներով։ Առաջնահերթությունները թելադրվում են գործադիր իշխանության կողմից, Հայաստանում այդպես էլ անկախ, ավտոնոմ քննություն, իրավապահ համակարգը չի զարգացել և առաջնահերությունները, որոնք դրված են, չեն բխում մեր շահերից։

Հեղինակ՝ Իզաբել Սահակյան

Աղբյուր` Փաստինֆո