Փաստ ինֆո

ՄԱԿ-ի գլխավոր քարտուղար Անտոնիու Գուտերիշն ակնկալում է, որ «Թալիբան» շարժումը կձեւավորի ներառական կառավարություն եւ կհարգի կանանց իրավունքները: Այս մասին ՏԱՍՍ-ի փոխանցմամբ՝ երեքշաբթի ճեպազրույցի ժամանակ հայտարարել է գլխավոր քարտուղարի պաշտոնական ներկայացուցիչ Ստեֆան Դյուժարիկը։

«Գլխավոր քարտուղարի կոչը «Թալիբանի» հասցեին այն է, որ նա կցանկանար տեսնել ներառական կառավարության ձեւավորումը, մարդու, հատկապես կանանց իրավունքների լիակատար հարգանքը», - ասել Է Դյուժարիկը: Բացի այդ, նշել է գլխավոր քարտուղարի ներկայացուցիչը, անհրաժեշտ է երաշխավորել, որ Աֆղանստանը չի օգտագործվի որպես ահաբեկչության բազա:

Դյուժարիկը Աֆղանստանին նվիրված Գուտերիշի հանդիպումը որակել է կառուցողական: Նա նշել է, որ Գուտերիշի հանդիպումը ՄԱԿ-ի ԱԽ-ի «հնգյակի» (Մեծ Բրիտանիա, Չինաստան, Ռուսաստան, ԱՄՆ եւ Ֆրանսիա) երկրների մշտական ներկայացուցիչների հետ կառուցողական է: «Դա շարունակական ջանքերի մի մասն է Անվտանգության խորհրդում միասնականության հասնելու, Աֆղանստանում իրավիճակի շուրջ միջազգային հանրության տարբեր մոտեցումների մերձեցման համար», - ասել է նա: «Այս հանդիպումը ճգնաժամի ներկա փուլի մեկնարկից ի վեր ինտենսիվ դիվանագիտական շփումների մի մասն էր»:

Աղբյուր` Փաստինֆո