Փաստ ինֆո

ՀՀ երկրորդ նախագահ Ռոբերտ Քոչարյանի և ՀՀ նախկին փոխվարչապետ, ԱԺ պատգամավոր Արմեն Գևորգյանի գործով դատական նիստը հետաձգվեց՝ տեխնիկական խնդիրների պատճառով; «Փաստինֆո»-ի հաղորդմամբ՝ Երևանի ընդհանուր իրավասության դատարանի դատավոր Աննա Դանիբեկյանը նիստի մեկնարկին հայտնեց, որ առկա են տեխնիկական խնդիրներ, մասնավորապես, էլեկտրաէներգիայի անջատման հետևանքով դատական նիստը չի կարող արձանագրվել ձայնագրման միջոցով, իսկ թղթային տարբերակով արձանագրությունը կարող է պատշաճ կերպով չիրականացվել: Կողմերի հետ հարցը քննարկելուց հետո դատարանը որոշեց հետաձգել դատական նիստը:

Նշենք, որ նախորդ դատական նիստին մեղադրող կողմը պետք է հրապարակեր մեղադրական եզրակացությունը, սակայն նիստը հետաձգվել էր, քանի որ պաշտպան Էրիկ Ալեքսանյանը հեռացել էր դատական նիստերի դահլիճից՝ դատավորին ինքնաբացարկ հայտնելու մասին միջնորդությունը նախապատրաստելու նպատակով: Իսկ ինքնաբացարկի հիմք է հանդիսացել Արմեն Գևորգյանի՝ անձեռնմխելիության հիմքով քրեական գործի վարույթը կասեցնելու և նրա անձեռնմխելիության հիմքով ՍԴ դիմելու մասին պաշտպաններ Էրիկ Ալեքսանյանի և Հովհաննես Խուդոյանի միջնորդությունները հետաձգելը, քանի որ դատավոր Դանիբեկյանն ավելի վաղ հայտնել էր, որ խնդիր է տեսնում քրեական հետապնդում իրականացնելու հետ կապված խնդիր և գտնում է, որ անհրաժեշտ է հաղթահարել անձի անձեռնմխելիությունը։

Պաշտպան Ալեքսանյանը հայտարարել էր, որ Աննա Դանիբեկյանը խուսափում է արդարադատություն իրականացնելուց, ունի ողջամիտ ենթադրություններ, որ դատավորը փոխել է իր դիրքորոշումը, հետևաբար՝ կասկածում է դատարանի օբյեկտիվության վրա: Այս հայտարարությունից հետո Ալեքսանյանը լքել է նիստերի դահլիճը:

Մեղադրող դատախազ Գևորգ Բաղդասարյանը հայտնեց, որ այս դատական նիստին պետք է քննարկման առարկա դարձվեր պաշտպան Ալեքսանյանի վարքագիծը և Ալեքսանյանի ներկայացրած ինքնաբացարկի միջնորդությունը, իսկ այդ հարցերի քննարկումից հետո, եթե հնարավորություն լիներ, մեղադրանքի կողմը կհրապարակեր մեղադրական եզրակացությունը;

Հիշեցնենք, որ նշված դրվագով Ռոբերտ Քոչարյանը մեղադրվում է առանձնապես խոշոր չափերով կաշառք ստանալու, իսկ Արմեն Գևորգյանը՝ առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո