Փաստ ինֆո

«Ո՞նց կլինի գիշերը՝ 4-5-ին գան շիրմաքար գողանան». Եռաբլուր զինվորական պանթեոնում քանդել և տարել են «Մարտական խաչ» 1-ին աստիճանի հերոս Նարեկ Գևորգյանի գերեզմանի շիրմաքարը, սյուները, նստարանները: 

«Քարը երկու-երեք հոգով չէին կարող հանել, կռանով են դրել, դրանով էլ պետք է հանեին։ Հիմա բոլորը ատկազ են կանգնում։ Մեղավորները պատասխան են տալու»,-«Փաստինֆո»-ի հետ զրույցում ասաց հերոսի հայր Ռոման Գևորգյանը։

44-օրյա պատերազմում նահատակված զինվորի ընտանիքի անդամները առավոտյան կառավարության դիմաց էին։ Հերոսի հայրը վստահեցրել է՝ վարչապետի հրամանով է եղել, կատարվածը որակել է սրբապղծություն։

«ԱԱԾ-ում իրենք ճշտում էին՝ ո՞ւմ հրամանով են քանդել երեխայի շիրիմը։ Իրենք էլ ճշտել են, որ վարչապետը հրաման չի տվել, որ երեխայի շիրիմը քանդեն։ Բացի դրանից գեներալ Վարդան Ավետիսյանը, ում հրամանով քանդել են շիրմաքարը, նա պետք է օրենքի ու Աստծու առաջ պատասխան տա»։

Ռոման Գևորգյանը տեղեկացրեց, որ նույն օրը ընտանիքի անդամների հետ մինչև գիշերը 03։00-ն եղել են Եռաբլուրում, ապացույցներ ունեն, որ քարերը տեղում էին։ Վստահ է, որ քարերը հանվել են գիշերը՝ իրենց գնալուց հետո։
«Մենք գնացել ենք ու մի ժամվա ընթացքում մեր հետևից քանդել են։ Ում հարցրեցի՝ ոչ ոք տեղյակ չէ։ Այսինք, եթե ոչ ոք տեղյակ չի, կարող է նույն ադրբեջանցին մտնի Եռաբլուր, անտերության է մատնված, պղծեն, քանդեն ու գնան։ Թող ԱԱԾ-ն, ոստիկանությունը զբաղվեն, իմանան»։

Փորձեցինք տեղեկանալ, արդյոք իրենց զգուշացրել էին շիրմաքարը հանելու մասին, արդյոք ՊՆ-ից զգուշացրե՞լ են, որ 44-օրյա պատերազմի զոհերի շիրմաքարերը միաձև պետք է լինեն, Գևորգյանը նշեց, որ օգոստոսի 19-ին հանդիպում են ունեցել նախարար Արշակ Կարապետյանի հետ, բանավոր պայմանավորվածություն են ձեռք բերել, թողնելու շիրմաքարը։

«Ռազմական ոստիկանության պետն էլ էր եկել։ Ներկայացրել եմ, որ այս քարը ես շատ շուտ եմ բերել, մինչև կառավարության որոշումը լինելը, որ պետք է բոլորը նույնաձև լինեն։ Դրա մասին տեղյակ է եղել նաև նախկին պաշտպանության նախարարը, լիքը մարդիկ, ովքեր անգամ ասել են, որ շատ սիրուն է լինելու։ Դրանից հետո նորանշանակ նախարարի հետ քննարկել ենք, ասել էի, որ օգոստոսի 23-ին տղայիս ծնունդն է, սալիկներն է մնացել, պետք է դնեինք, որ ավելի մաքուր լինի»։

Հերոսի հայրը տեղեկացրեց, որ Արշակ Կարապետյանը իրեն թույլատրել է սալիկներն էլ տեղադրել, դրա մասին տեղեկացրել է նաև գեներալ Վարդան Ավետիսյանին։

«Եկել են սալիկապատել։ Օգոստոսի 23-ին տղայիս ծննդյան օրը նույն գեներալը գալիս է, խոնարհվում է, խունկ են ծխում ու հետո գալիս են հանում առանց իմ տեղեկության։ Այսինքն, այսօր ոչ ոք իրենց պայմանավորվածությունը չի պահել։ Էսօր խաբում, ասում են վարչապետի հրամանով է, այսօր պարզվում է, վարչապետը անգամ տեղյակ էլ չէ»։

Ռոման Գևորգյանը պնդում է, որ գեներալ Վարդան Ավետիսյանը, ՌՈ պետը իրեն հայտնել են, որ կատարում են վարչապետի հրամանը։
«Ասում են՝ մենք կատարում ենք վարչապետի հրամանը։ Իրենց բառերն են, իրենք պատասխան են տալու։ Եթե վարչապետն է հրաման տվել, պետք է պատասխան, եթե չէ, ուրեմն վարչապետը պետք է ասի՝ ինչի՞ են իրենք իր անունից հրաման տալիս։ Ասեցի բերեք ծանոթանամ հրամանին, ասաց գաղտնիություն է»։

Գևորգյանը մեկ օր ժամանակ է տվել պատասխանատուներին, շիրմաքարը հետ տեղադրելու համար։ Ընտանիքը այսօր երեկոյան կայցելի հերոսի շիրիմին։

«Պետք է մինչև վաղը քարը դնեն։ Երկու օրվա մեջ հանդիպում պետք է լինի Փաշինյանի հետ։ Մենք ժամանակ ենք տվել, սպասում ենք։ Ոնց հանել են, պետք է բերեն դնեն տեղադրեն։ Ով արել է սրբապղծությունը, պատասխան է տալու»,- եզրափակեց հերոսի հայրը։

Աղբյուր` Փաստինֆո