Փաստ ինֆո

Պաշտպանները պահանջում են վերացնել ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոցը, իսկ դրա անհնարինության դեպքում՝ նվազեցնել գրավի չափը։

Նշենք, որ Վերաքննիչ քրեական դատարանում այսօր կայացել է Ռոբերտ Քոչարյանի և մյուսների նկատմամբ ՀՀ ՔՕ 300.1-րդ հոդվածով քրեական հետապնդումը դադարեցնելու դատական ակտի դեմ ներկայացրած բողոքների քննությունը։ Առաջին ատյանի դատարանը միևնույն դատական ակտով դադարեցրել էր քրեական հետապնդումը, բայց մերժել Ռոբերտ Քոչարյանի նկատմամբ ընտրված խափանման միջոց գրավը վերացնելու կամ գրավի չափը նվազեցնելու պաշտպանների միջնորդությունը, ինչը վիճարկվել է պաշտպանության կողմից։ Դատական այս ակտիվ դեմ վերաքննիչ բողոք է ներկայացրել, թե պաշտպանական, թե մեղադրող կողմը։

Վերջինս պահանջում է բեկանել նշված դատական ակտը և գործն ուղարկել նոր քննության, իսկ պաշտպանության կողմը՝ դատական ակտը բեկանել մասնակի՝ միայն Քոչարյանի խափանման միջոցի մասով։

Պաշտպան Հովհաննես Խուդոյանը դատարանում արձանագրեց, որ ներկայումս էականորեն նվազել է մեղսագրվող արարքների մեղադրանքի ծանրությունը եւ նրա դիտարկմամբ՝ ի թիվս այլնի, պետք է գնահատվի նաև մեղսագրվող արարքների հանրային վտանգավորությունը և, եթե նախկինում մեղադրանքի էական մասն էր կազմում հանրության լայն շերտերին, պետական գրեթե բոլոր ինստիտուտներին վերաբերող իրադարձությունների վերաբերյալ խիստ զգայական և նախադեպ չունեցող գործը՝ հակասահմանադրական ճանաչված հոդվածով առաջադրված մեղադրանքի շրջանակում, ապա ներկայում քննվում է որևէ բարդություն չներկայացնող գործ, որի նկատմամբ հանրային ընկալումը տարբերվում է նախորդ մեղադրանքից։ Խուդոյանի խոսքով՝ դատարանի այն փաստարկը, որ անկախ քրեական գործով ներգրավված անձանց քանակից գրավը ենթակա չէ վերացման, իսկ գրավի չափը՝ փոփոխության, իրավաչափ չէ։

Ներկայացնելով վերաքննիչ բողոքի հիմքերը՝ պաշտպանը խնդրեց բավարարել այն ու վերացնել Ռոբերտ Քոչարյանի նկատմամբ ընտրված խափանման միջոցը, կամ նվազեցնել գրավի չափը։

Դատարանը որոշեց հետաձգել դատական նիստը։ Հաջորդ դատական նիստը նշանակվել է սեպտեմբերի 15-ին՝ ժամը 10.30-ին։

Հիշեցնենք, որ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։

ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։

Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։

Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։

Դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։

Վերաքննիչ բողոքները քննվում են համատեղ՝ Վերաքննիչ քրեական դատարանի դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի։

Հեղինակ՝ Իզաբել Սահակյան

Աղբյուր` Փաստինֆո