Փաստ ինֆո

Բռնի անհետացումների միջազգային օրը խորհրդարանում այսօր ընդունել են 44-օրյա պատերազմի ժամանակ անհետ կորած զինծառայողների հարազատներին։ Այս մասին «Փաստինֆո»-ին տեղեկացրեց անհետ կորած զինծառայողներից մեկի հարազատ Արսեն Ղուկասյանը։ Հանդիպմանը ներկա են եղել ԱԺ երեք խմբակցության ներկայացուցիչները, ինչպես նաեւ ՊՆ և սոցապ ներկայացուցիչներ, ՀՀ ԱՆ գլխավոր դատաբժշկական փորձագետ Մհեր Բիշարյանը։ Բարձրացված մի շարք հարցերին հարազատները բավարար պատասխան չեն ստացել։

«Հարցեր են հնչել՝ ինչի՞ են մինչև հիմա մեր երեխաները անհետ կորած, ո՞ւր են, ո՞նց են, և որի պատասխանը ոչ ոք չի կարողանում տալ՝ ոչ երկրի ղեկավարությունը, ոչ կառավարությունը։ ԱԺ-ից էլ առավել ևս որեւէ մեկը չի կարողանա այդ հարցերին լիարժեք պատասխանի։ Ասում են՝ բանակցում ենք ու վերջ, այդ մի բանով սահմանափակվում են»,- ասաց Ա.Ղուկասյանը։

Ուրբաթ՝ կառավարության նիստի ժամանակ հարազատները հանդիպում էին ունեցել գործադիրում, մի քանի օր ժամանակ տվել կառավարությանը՝ օր նշանակելու ու հանդիպելու համար։ Խորհրդարանում այսօրվա հանդիպումը, ինչպես Ղուկասյանը տեղեկացրեց, ավելի վաղ էր պլանավորվել։

«Կառավարությունում հանդիպմանը չեմ մասնակցել, քանի որ ինձ փոխանցեցին, որ իմ մուտքը «արգելված է», համենայն դեպս ասացին՝ 5-6 հոգի բարձրանա, բացի Արսենից։ Այսօրվա պայմանավորվածությունը շատ ավելի շուտ է եղել՝ մի անգամ էլի ծնողները հանդիպում են ունեցել այստեղ ու որոշել են, որ պետք է այս ֆորմատով հանդիպում լինի»,- փոխանցեց նա։
Անհետ կորած զինծառայողների հարազատները տարբեր ֆորմատների հանդիպումներ են ունենում արդեն շուրջ 10 ամիս։ Հարազատների հարցերը բարձրաձայնվել են թե ՀՀ-ում, թե միջազգային ատյաններում, սակայն անարդյունք։ Ղուկասյանը նշեց՝ մի քանի ծնողի անունից հայտարարում է, պատրաստակամ ենք գնալու մինչև վերջ՝ բոլոր հարցերին հստակ պատասխան ստանալու համար։

Ադրբեջանական իշխանությունները հերքում են տասնյակ հայ զինծառայողների և քաղաքացիական անձանց գերեվարման փաստը, որի առնչությամբ կան հստակ ապացույցներ։ Պաշտոնական Բաքուն բացահայտ կերպով արհամարհում է նաև ՄԻԵԴ-ի համապատասխան որոշումները՝ Ադրբեջանում գերեվարված հայ զինվորականների և պատանդառված քաղաքացիական անձանց մասին տեղեկատվություն տրամադրելու վերաբերյալ: Արսեն Ղուկասյանը նշում է, որ Ադրբեջանի վրա ճնշում գործադրել ոչ իշխանությունները, ոչ հարազատները չեն կարող։

«Ադրբեջանը չի ընդունում ու մենք չենք կարող ուժ գործադրել։ Ադրբեջանի վրա կարող են այդպիսի լծակներ օգտագործել մի շարք ուժեղ պետությունների ղեկավարներ, կամ ինչ որ կառույցներ, որոնց հետ անձամբ ծնողները այս պահին հնարավորություն չունեն կապվելու, բայց մենք այս հարցով անգամ Մոսկվա ենք գնացել, մի քանի հանդիպումներ ունեցել այն մարդկանց հետ, որոնց անունները չեմ կարող հրապարակել։ Որքան հասկանում ենք, այնտեղից էլ մեզ չեն կարող պատասխանել»,- նշեց Ղուկասյանը։

Աղբյուր` Փաստինֆո