Փաստ ինֆո

Ադրբեջանի կողմից Գորիս-Կապան միջպետական ճանապարհի փակումը շարունակական բնույթ է կրելու։ Ադրբեջանը կփորձի ստորագրվելիք փաստաթղթում իր դիրքերն ավելի բարենպաստ դարձնել և կկորզի այն հնարավոր զիջումները, որին Հայաստանը պատրաստ է գնալ։ «Փաստինֆո»-ի հետ զրույցի ժամանակ այս մասին ասաց Ադրբեջանի հարցով փորձագետ Գառնիկ Դավթյանը։ 

Նրա արձանագրմամբ՝ Սյունիքում այլընտրանքային ճանապարհը մեկ օրում չի կառուցվելու։ Լինելու է մի քանի ամսվա աշխատանք, հետևաբար մոտակա ամիսների ընթացքում Ադրբեջանը կփորձի կրկին փակել ճանապարհը։

«Ադրբեջանը հասկանում է, որ գործող իշխանությունը չունի պնդաճակատություն և իր պետական շահն առաջ մղելու ցանկություն, ինչի վառ ապացույցն ադրբեջանական տեղանունները նշելն էր։ Ադրբեջանը տեսնում է, որ հայկական կողմը հստակ պատկերացում չունի, թե օրինակ մեկ տարի հետո Հայաստանն ինչ կարգավիճակում և ինչ սահմաններով պետք է լինի։ Ադրբեջանը, որտեղ հնարավոր է իրեն սանձարձակ է պահում՝ վստահ լինելով, որ հայկական կողմից չեն լինի առնվազն ուժային պատասխան, ինչպես նաև քաղաքական մեսիջներ։ Այս իմաստով յուրաքանչյուր պետություն էլ կօգտվեր նման թույլ իշխանությունից ու կփորձեր կորզել առավելագույնը, որ օրինակ 5 տարի առաջ հնարավոր չէր լինի կորզել»,-նշեց Գառնիկ Դավթյանը։

Փորձագետի խոսքով՝ Ադրբեջանը փորձում է ստանալ ոչ միայն փաստաթղթով ակնկալվող զիջումները, այլև հետագայում սահմանագծումն ու սահմանազատումն իրականացվի այն գծով, որով Ադրբեջանն է կամենում։ Գառնիկ Դավթյանը տեղանունների ադրբեջաներեն անվանումն օգտագործելը դիտարկում է որպես Ադրբեջանի տարածքային ամբողջականության ճանաչման առաջին քայլ.

«Այսինքն` մասնակի ճանաչում։ Չնայած իրավաբանորեն մասնակի ճանաչում չկա, բայց եթե քաղաքական տեսակետից նայենք, դա քայլ էր, ըստ որի՝ Հայաստանը տվեց հստակ մեսիջ, որով համաձայնեց՝ ադրբեջանական սահմանն առնվազն այդ երկու բնակավայրերում արդեն ճշգրտված է։ Եթե նկատենք, լարումները հիմնականում Գեղարքունիքի մարզի Սոթքի, Վերին Շորժայի հատվածում են, իսկ Սյունիքում նման լարումներ չկան։ Կրակոցներ այնտեղ գրեթե չկան կամ 3-4 ամիսը մեկ են լինում, բայց հիմնական լարումը Սոթք, Վերին Շորժա հատվածում է, որտեղ ենթադրում եմ՝ հայկական կողմը չի համաձայնել Ադրբեջանի ներկայացրած պահանջներին»,-նշեց փորձագետը։

Դիտարկմանը, որ ըստ իշխանության՝ խնդրի լուծումն այլընտրանքային ճանապարհը կլինի, Գառնիկ Դավթյանը նկատեց՝ գործող իշխանությունը պատկերացում չունի՝ ինչ է պետականությունը, ինչ՝ տարածքային ամբողջականությունը։

«Եթե Ադրբեջանը պատրաստ էր իր ամբողջ ժողովրդին զոհել Արցախն ինչպես իրենք են ասում «ազատագրելու» համար, ապա այս իշխանությունը պատրաստ է ամեն ինչ զիջել՝ աթոռը պահպանելու համար։ Իշխանությունների մոտ պետականության լուրջ ընկալում չկա, պոպուլիստական հայտարարություններով են առաջնորդվում»,-հավելեց Գառնիկ Դավթյանը։

Աղբյուր` Փաստինֆո