Փաստ ինֆո

Օգոստոսի 27-ին` ժամը 22։00-ից հետո ադրբեջանական կողմը տարբեր տրամաչափի զինատեսակներից կրակել է Գեղարքունիքի մարզի Կութ գյուղի ուղղությամբ, որի հետեւանքով վնասվել են նաեւ բնակարանների պատերը: Գեղամասար համայնքի ղեկավար Հակոբ Ավետյանը «Փաստինֆո»-ին տեղեկացրել է, որ գյուղի բնակիչները անհանգստացած էին։

«ДШК զենք են կիրառել։ Նույնիսկ տան պատերին են փամփուշտները կպել։»։

Ըստ Ավետյանի՝ մի քանի օր իրավիճակը հանգիստ է եղել, թշնամին չի կրակում, մինչև նախօրեի սադրանքը։ Այս պահի դրությամբ իրավիճակը հանգիստ է։ Համայնքի գյուղերում կարճ կրակոցները կարելի է ասել մշտական բնույթ են կրում։

«Գրեթե միշտ էլ սահմանին կրակոցներ են լինում։ Կարող է օդ չեն կրակում, նպատակային են կրակում, բայց, որ զոհ չենք ունենում, մտածում ենք օդ են կրակում։ Արդեն այն ձևն է, որ այդ քիչ կրակոցներին ուշադրություն չենք դարձնում։ Կարծես սովորական է դարձել իսկ երեկվանը, որ արդեն գյուղի ուղղությամբ են կրակել, նույն հաջողությամբ կարող էր մարդու կպնել, պատին չկպնել»։

Հարցին՝ իրավիճակի հանգուցալուծումը ինչպե՞ս են տեսնում, կարծո՞ւմ են, որ ադրբեջանական կողմը կանգնած է մնալու ՀՀ տարածքում, Ավետյանը նշեց, որ հարցը պետք է ոչ թե համայնքում, այլ Երևանում լուծվի։

«Տեսնում ենք Գորիս-Կապան ճանապարհահատվածում ինչ եղավ։ Արդեն զգում ենք, որ մյուս տեղերում էլ նման բան են սարքում՝ էլի կրակոցներ, որ լարված պահեն ընդհանուր սահմանի երկայնքով։ Ծրագրված անում են, պատահականություն չի լինում, բայց ամեն դեպքում հարցը մեր համայնքում չի լուծվելու, պետք է հասկանալ կառավարությունը կարողանու՞մ է ինչ -որ բան անի, որովհետև իրավիճակը մարդկանց գնալով ավելի է խուճապի տանում, ավելի անորոշ վիճակի մեջ ենք հայտնվում։ Պարտադիր չէ, որ մեր համայնքում լինի ինչ որ բան, որ անհանգստանանք։ Գորիս-Կապան հատվածում ճանապարհը փակելը լուրջ անհանգստացնող էր ու հիմա էլ չենք կարողանում պատկերացնել սպասվելիք խնդիրները»։

Ավետյանը հայտնեց, որ ռուս սահմանապահները պատրաստվում են տեղակայվել Գեղամասար համայնքի սահմանային հատվածներում, սակայն համայնքապետը մանրամասներ չհայտնեց։

«Մեր համար կարևոր է, որ սահմանին խաղաղություն լինի, մարդիկ հասկանան իրենց գործով կարո՞ղ են զբաղվել։ Ոչ մեկիս համար էլ ցանկալի չէր մեր տանը ունենանք օտար հյուր, բայց այս դեպքում այլ տարբերակ չկա»։

Համայնքապետը վստահեցնում է, որ գիշերվա կրակոցները մարդկանց մոտ խուճապ են առաջացրել, իսկ եթե վստահ լինեն, որ դրանք չեն լինի, իրենց վաղվա օրը կարող են պլանավորել։

«Պետք է վստահ լինեն, որ ցանք կարող են անել, շուտով ձմեռ է, նորից գարունը որ եկավ մարդիկ հույս պետք է ունենան, որ կարող են սկսեն աշխատել, որ բերքահավաք անեն, իսկ այս վիճակում չգիտեն՝ գարունը որ ցանեն, աշնանը կարո՞ղ են բերքահավաք անել, թե ոչ»։

Ավետյանը անձամբ 200 հա-ից ավելի կարտոֆիլ է ցանել ու լուրջ անհանգստանում է բերքահավաքի համար։ Ասում է՝ եթե այսպես շարունակվի՝ խնդիր է տեսնում բերքահավաքի ժամանակ։

«Նախ զորահավաք են անում։ Երիտասարդներ չեն մնում, աշխատող ուժեր չեն մնում։ Էդպես ո՞նց է լինելու, տնտեսությունն էլ է շատ տուժելու ու այս վիճակը մարդկանց տանում է ավելի վատ վիճակի ու մարդիկ էլ լավ օրի չեն ապրում, առանց այդ էլ դժվարությունով են ապրել։ Մի քիչ էլ դժվարանա վիճակը, շատերի մոտ այն տրամադրվածությունն է, որ ավելի լավ է թողենք դուրս գան»։

Ավետյանն աշխատում է այնպես անել, որ գյուղերից արտագաղթ չլինի, սակայն որոշ մարդիկ արդեն արտագաղթել են։ Եթե դա էլ լինի՝ հիսաթափությունն ավելի մեծ կլինի։ Բնակիչները հիմնականում հողագործությամբ ու անասնապահությամբ են զբաղվում։

Աղբյուր` Փաստինֆո